ضلع شانگلہ کے علاقے بشام میں ایک نایاب اور دل کو چھو جانے والا واقعہ پیش آیا، جہاں 90 سالہ بزرگ عالم دین مولانا سیف اللہ کی دوسری شادی کے لیے ان کے چاروں بیٹوں نے ان کی دیرینہ خواہش کو پورا کیا۔

مولانا سیف اللہ کی پہلی بیوی کا انتقال سات سال قبل ہوا تھا، جس کے بعد انہوں نے دوبارہ شادی کرنے کی خواہش ظاہر کی۔ ان کے بیٹوں نے اس خواہش کو اہمیت دی اور 55 سالہ خاتون سے ان کا نکاح ایک تولہ حق مہر پر کروا دیا۔

مزید پڑھیں: فیروز خان کا دوسری شادی سے متعلق حیران کن انکشاف

شادی کی تقریب میں مقامی افراد، خاندان کے افراد، پوتے پوتیوں اور دوستوں کی بڑی تعداد نے شرکت کی۔ اس اقدام کو مقامی افراد اور سوشل میڈیا پر مثالی قرار دیا گیا ہے، کیونکہ یہ بزرگوں کی دوبارہ شادی کے حوالے سے معاشرتی ذہنیت میں تبدیلی کی طرف ایک مثبت قدم ہے۔

اس واقعے نے نہ صرف مقامی سطح پر بلکہ سوشل میڈیا پر بھی وسیع پیمانے پر توجہ حاصل کی ہے، جہاں لوگوں نے اس اقدام کو سراہا اور بزرگوں کی خواہشات کو اہمیت دینے کی ضرورت پر زور دیا۔

یہ واقعہ ایک مثال ہے کہ عمر کی کوئی حد نہیں ہوتی اور انسان کی خواہشات کو پورا کرنا اور ان کی عزت کرنا ہماری معاشرتی ذمہ داری ہے۔