بھارتی میڈیا کی انتہا کی حد تک غیرذمہ دارانہ اور منفی رپورٹنگ کی وجہ سے ساکھ انتہائی مجروح ہوچکی ہے، اور خود بھارت کے اندر سے مختلف شعبہ ہائے زندگی سے تعلق رکھنے والے افراد بھارتی میڈیا کو تنقید کا نشانہ بنا رہے ہیں۔

حال ہی میں اداکارہ پرینیتی چوپڑا نے بھی اپنے میڈیا اداروں پر تنقید کی ہے۔ اپنی انسٹاگرام اسٹوری میں اداکارہ پرینیتی چوپڑا نے کہا کہ اس وقت سب سے زیادہ نقصان دہ عمل غیر مصدقہ اور گمراہ کن معلومات پھیلانا ہے، جو عوام میں خوف اور بے یقینی پیدا کر رہا ہے۔

انہوں نے بھارتی عوام کو مشورہ دیا کہ وہ صرف آفیشل ذرائع پر اعتماد کریں اور بھارتی میڈیا کو مشورہ دیا کہ وہ ذمہ داری سے رپورٹنگ کریں۔

قبل ازیں گزشتہ روز بھارتی اداکارہ سوناکشی سنہا نے بھارتی میڈیا کو جھوٹی رپورٹنگ پر آڑے ہاتھوں لیتے ہوئے کہا تھا کہ میڈیا خوف و ہراس پھیلانے اور غیر ذمہ دارانہ رپورٹنگ سے باز آئے۔

سوناکشی کا کہنا تھا کہ ہمارے نیوز چینلز ایک مذاق بن چکے ہیں۔ جو مبالغہ آرائی، چیخنے چلّانے والی آوازوں کے ساتھ وہ ڈرامہ دکھا رہے ہیں جس سے دماغ گھوم گیا ہے۔

اداکارہ نے سوال اُٹھایا کہ آخر یہ سب کیا ہو رہا ہے؟ میڈیا والے اپنا کام صحیح طریقے سے کریں، صرف سچ دکھائیں۔ جنگ کو سنسنی خیز بناکر عوام میں خوف پیدا نہ کریں۔