بھارتی ایئرفورس کے ایئر مارشل اے کے بھارتی ایک پریس کانفرنس کے دوران رافیل طیاروں کے مار گرائے جانے سے متعلق سوالات پر پریشان دکھائی دیے اور سوالات کے واضح جوابات دینے سے گریز کیا۔

بھارتی صحافی کی جانب سے پوچھے گئے سوال پر ایئرمارشل نے صرف یہ جواب دیا کہ ہم جنگ کی حالت میں تھے اور جنگ میں نقصانات ہوتے ہیں۔

جب صحافی نے دوبارہ وضاحت طلب کی کہ پاکستان نے بھارت کے جدید طیارے تباہ کیے ہیں کیا آپ بتا سکتے ہیں کہ وہ کون سے جدید طیارے ہیں تو اس سوال پر ایئرمارشل اے کے بھارتی نے برہمی کا اظہار کیا اور کہا کہ آپ میرے منہ میں اپنے سوالات نہیں ڈال سکتے۔

مزید پڑھیں: فرانس نے بھارتی رافیل طیارے گرنے کی تصدیق کردی

صحافی نے ایئر مارشل سے استسفار کیا کہ انڈین ایئرفورس نے پاکستان کے طیارے مار گرانے کے دعوے کیے ہیں کیا آپ کے پاس پاکستانی طیاروں کی تباہی کی تفصیلات ہیں تو اس پر بھی بھارتی ایئرمارشل کوئی جواب نہ سکے۔

ایئرمارشل کی جانب سے طیاروں کو مار گرانے کے دعوے کی تفصیلات نہ دینا، اور براہ راست سوالات سے گریز کرنا کئی حلقوں میں سوالیہ نشان بن گیا ہے۔ سوشل میڈیا پر بھی اس رویے پر بحث جاری ہے، جہاں صارفین حکومتی بیانیے میں شفافیت کی کمی پر تنقید کر رہے ہیں۔