امریکی صدر ڈونلڈ ٹرمپ نے کینیڈا کو ایک غیر معمولی اور انوکھی پیشکش کرتے ہوئے کہا ہے کہ اگر کینیڈا امریکا کی 51ویں ریاست بننے پر آمادہ ہو جائے، تو اُسے جدید ترین ’گولڈن ڈوم‘ میزائل دفاعی نظام مفت فراہم کیا جائے گا۔

یہ بیان ٹرمپ نے اپنے سوشل میڈیا پلیٹ فارم ’ٹروتھ سوشل‘ پر جاری کیا، جس میں انہوں نے کہا کہ اگر کینیڈا خودمختار ریاست کے طور پر برقرار رہا تو اسے اس نظام کا حصہ بننے کے لیے 61 ارب ڈالر ادا کرنا ہوں گے۔

مزید پڑھیں: امریکی صدر ڈونلڈ ٹرمپ نے غزہ بحران کو سنگین مسئلہ قرار دے دیا

ٹرمپ نے حال ہی میں اعلان کیا تھا کہ ان کی قیادت میں امریکا ایک جدید میزائل ڈیفنس سسٹم “گولڈن ڈوم” تیار کرے گا، جس پر 175 ارب ڈالر لاگت آئے گی۔ یہ سسٹم زمین کے ساتھ ساتھ خلا میں بھی میزائل حملوں کو روکنے کی صلاحیت رکھے گا، جس میں سیٹلائیٹ ٹریکنگ اور اسپیس انٹرسیپٹرز بھی شامل ہوں گے۔

کینیڈا کے وزیراعظم مارک کارنی نے حالیہ بیان میں کہا تھا کہ ان کا ملک گولڈن ڈوم منصوبے میں سرمایہ کاری پر غور کر رہا ہے، مگر امریکا میں ضم ہونے کا کوئی امکان نہیں۔

انہوں نے واضح کیا کہ کینیڈا اپنی خودمختاری اور قومی سالمیت پر کسی قسم کا سمجھوتہ نہیں کرے گا۔