وفاقی وزیرداخلہ محسن نقوی نے عمان کے دارالحکومت مسقط میں عمان کی وزارت داخلہ کا دورہ کیا، جہاں عمان کے وزیرداخلہ حمود بن فیصل البوسیدی نے ان کا پرتپاک استقبال کیا۔

اس موقع پر دونوں رہنماؤں کے درمیان اہم ملاقات ہوئی، جس میں خطے کی موجودہ صورتحال اور دوطرفہ تعلقات کے حوالے سے تفصیلی بات چیت کی گئی۔

وزیرداخلہ محسن نقوی نے اپنی ملاقات میں پاکستان اور بھارت کے مابین حالیہ کشیدگی پر پاکستان کے اصولی مؤقف سے عمانی ہم منصب کو آگاہ کیا۔

انہوں نے کہا کہ پاکستان کا مؤقف بہت واضح ہے، اگر جنگ مسلط کی گئی تو ہم بھرپور جواب دیں گے۔ تاہم، پاکستان ایک پُرامن ملک ہے اور ہم خطے میں پائیدار امن کے خواہاں ہیں۔

محسن نقوی نے مزید کہا کہ بلیم گیم کے ذریعے کشیدگی میں مزید اضافہ ہو رہا ہے، اور ہمیں اس کے حل کے لیے مثبت اقدامات کی ضرورت ہے۔

مزید پڑھیں:  محسن نقوی سے سلطنت عمان کے سفیر کی ملاقات، باہمی دلچسپی کے امور پر تبادلہ خیال

عمان کی جانب سے خطے میں امن اور استحکام کے فروغ میں کلیدی کردار ادا کرنے کی تعریف کرتے ہوئے انہوں نے کہا کہ بین الاقوامی تنازعات کے حل کے لیے عمان کا کردار قابل تعریف ہے۔

دونوں وزرائے داخلہ نے دوطرفہ تعلقات کو مزید مستحکم کرنے کے لیے کوآرڈینیشن میں بہتری لانے کا فیصلہ کیا۔ اس کے ساتھ ہی، اسلام آباد اور مسقط کو سسٹر سٹیز قرار دینے پر اصولی اتفاق بھی کیا گیا۔

وزیرداخلہ محسن نقوی نے عمان کے سلطان کا شکریہ ادا کیا کہ انہوں نے عید کے موقع پر پاکستانی قیدیوں کے لیے ایمنسٹی کا اعلان کیا تھا۔ اس کے علاوہ، دونوں رہنماؤں نے عمان کی جیلوں میں قید پاکستانی شہریوں کی وطن واپسی کے حوالے سے باہمی اشتراک کو مزید بڑھانے پر بھی تبادلہ خیال کیا۔

محسن نقوی نے اس عزم کا اظہار کیا کہ پاکستان اور عمان کے برادرانہ اور تاریخی رشتہ کو نئی بلندیوں تک لے کر جائیں گے، اور دونوں ممالک کے درمیان تعاون کو مزید فروغ دیا جائے گا۔