گزشتہ ماہ سے جاری پاک بھارت کشیدگی کے درمیان ہونے والی جنگ بندی کے دوران دونوں ممالک نے قیدیوں کا تبادلہ کیا ہے، دونوں ممالک نے ایک دوسرے کے ایک ایک قیدی کو ایک دوسرے کے حوالے کیا ہے۔

بول نیوز کے مطابق جنگ بندی کے دوران پنجاب رینجرز نے بی ایس ایف کے اہلکار پورنم کمار کو بھارت کے حوالے کیا ہے، جبکہ بھارت نے پنجاب رینجرز کے محمد اللہ کو پاکستانی حکام کے حوالے کیا ہے۔

رپورٹ کے مطابق بی ایس ایف کے اہلکار پورنم کمار کو 23 اپریل 2025 کو گنڈا سنگھ والا/فیروز پور سیکٹر میں پاکستانی حدود میں غیر ارادی طور پر داخل ہونے پر گرفتار کیا گیا تھا

یہ بھی پڑھیں:  پاکستان نے بھارت کے خلاف ایف-16 طیاروں کا استعمال نہیں کیا

واقعے کے بعد پاکستانی حکام نے قانونی و حفاظتی تقاضے مکمل کیے، جس کے بعد آج واہگہ/اٹاری سرحد پر باقاعدہ طور پر اس کی واپسی عمل میں لائی گئی۔

بی ایس ایف انڈیا کی جانب سے جاری کردہ بیان میں تصدیق کی گئی  کہ پاکستان رینجرز نے پورنم کمار کو بحفاظت واپس انڈیا کے حوالے کیا ہے۔

انڈین حکام نے اس اقدام کو سراہا ہے اور اسے ایک مثبت اشارہ قرار دیا ہے۔

یہ اقدام ایسے وقت میں سامنے آیا ہے جب دونوں ممالک کے تعلقات کشیدہ ہیں۔ دونوں ملکوں کے بارڈر بند ہیں اورمحدود جنگی جھڑپوں کے بعد سے دونوں ممالک کے درمیان تعلقات ابھی تک کشیدہ ہیں۔