پی ایس ایل سیزن 10 کے کامیاب انعقاد کے بعد لاہور ایک بار پھر عالمی کرکٹ کے میزبان کے طور پر سامنے آیا ہے اور اس بار نہ صرف میدان سجا ہے بلکہ سیکیورٹی کے غیر معمولی انتظامات نے شہر کو ایک قلعے میں تبدیل کر دیا ہے۔

بنگلہ دیش اور پاکستان کے مابین جاری ٹی 20 سیریز کے موقع پر لاہور پولیس نے سیکیورٹی کے تمام معیارات پر مکمل عملدرآمد یقینی بنا دیا ہے۔

ڈی آئی جی آپریشنز لاہور فیصل کامران کے مطابق، سیریز کے دوران سیکیورٹی کا ایک چار درجاتی حفاظتی حصار قائم کیا گیا ہے، جس کے تحت 11 ہزار سے زائد پولیس اہلکار تعینات کیے گئے ہیں۔

ان میں ڈولفن فورس، ایلیٹ یونٹس، بم ڈسپوزل اسکواڈ، اور لیڈی پولیس اہلکار شامل ہیں تاکہ ہر ممکن خطرے کا بروقت سدباب کیا جا سکے۔

مزید پڑھیں : قومی کرکٹ ٹیم کا ٹی 20 سیریز کیلیے 3 گھنٹے پریکٹس سیشن، وڈیو دیکھیں

میچ کے مقامات اور اس کے اطراف سی سی ٹی وی کیمروں سے چوبیس گھنٹے نگرانی جاری ہے جبکہ داخلی راستوں پر واک تھرو گیٹس اور جدید اسکیننگ سسٹمز کو فعال رکھا گیا ہے۔

بلند عمارتوں پر اسنائپرز تعینات ہیں اور مشکوک حرکات پر فوری ردعمل کے لیے اسپیشل الرٹ فورس ہر زون میں موجود ہے۔

ڈی آئی جی آپریشنز کا کہنا ہے کہ ہمارا پہلا ہدف ہر ایونٹ کو محفوظ اور خوشگوار بنانا ہے۔ شہریوں سے تعاون کی اپیل ہے کہ وہ سیکیورٹی چیکنگ کے دوران اہلکاروں سے بھرپور تعاون کریں۔

اسٹیڈیم میں آنے والی خواتین اور فیملیز کی معاونت کے لیے لیڈی پولیس اہلکار تعینات کی جا رہی ہیں تاکہ ماحول کو ہر لحاظ سے آرام دہ اور محفوظ بنایا جا سکے۔

سپروائزری افسران دیگر سیکیورٹی اداروں سے مسلسل رابطے میں ہیں تاکہ مربوط ردعمل ممکن ہو۔

فیصل کامران نے واضح کیا کہ پولیس اہلکاروں کو ہدایت دی گئی ہے کہ وہ ہمیشہ کی طرح عوام کے ساتھ خوش اخلاقی اور مددگار رویہ اختیار کریں تاکہ سیکیورٹی کے ساتھ ساتھ مثبت تاثر بھی قائم رہے۔