وفاقی وزیر برائے مذہبی امور سردار محمد یوسف نے پریس کانفرنس کرتے ہوئے کہا ہے کہ حکومت عازمینِ حج کو زیادہ سے زیادہ سہولیات کی فراہمی یقینی بنانے کے لیے بھرپور اقدامات کر رہی ہے۔

انہوں نے انکشاف کیا کہ پرائیویٹ حج اسکیم میں بعض سنگین انتظامی کوتاہیوں کے باعث کئی افراد حج کی سعادت سے محروم ہو سکتے ہیں۔

وفاقی وزیر نے بتایا کہ پاکستان کا مجموعی حج کوٹہ ایک لاکھ 79 ہزار ہے، جس میں سے 25 ہزار 698 عازمین حج نجی اسکیم کے تحت روانہ ہوں گے۔

 تاہم نجی حج ٹور آپریٹرز کی جانب سے مناسب اور بروقت انتظامات نہ کیے جانے کے باعث مسائل نے جنم لیا ہے۔

مزید پڑھیں: نجی حج اسکیم: 67 ہزار عازمین کی امیدیں دم توڑ گئیں، وزارت مذہبی امور کی وضاحت

سردار یوسف نے کہا کہ سعودی عرب کے حالیہ دورے کے دوران انہوں نے سعودی وزیرِ حج سے ملاقات کی اور مختلف امور پر تبادلہ خیال کیا۔

سعودی حکام نے نجی شعبے کو ہدایت کی تھی کہ وہ 14 فروری تک 25 فیصد رقم جمع کروائیں، مگر بعض ٹور آپریٹرز اس شرط پر عمل نہ کر سکے۔

وفاقی وزیر نے تشویش کا اظہار کرتے ہوئے کہا کہ افسوسناک بات یہ ہے کہ چند افراد کی غفلت اور انتظامی کوتاہی کی وجہ سے کچھ عازمین اس سال حج پر نہیں جا سکیں گے۔

انہوں نے مزید بتایا کہ وزیراعظم نے اس معاملے کی مکمل انکوائری کے لیے ایک کمیٹی قائم کر دی ہے تاکہ ذمہ داروں کا تعین کیا جا سکے اور متاثرین کو انصاف مل سکے۔

سردار محمد یوسف نے واضح کیا کہ نجی حج آپریٹرز اُن نقصانات کے براہِ راست ذمہ دار ہیں جو عازمین کو پہنچے ہیں۔