میلسی کے نواحی علاقے صدیق آباد میں تیز رفتار ٹرالر نے موٹر سائیکل کو کچل دیا، جس کے نتیجے میں 2 معصوم بہنیں جاں بحق اور 2 معصوم بہن بھائی زخمی ہوگئے ہیں۔

اطلاعات کے مطابق چاروں بچے سنہری مستقبل کے خواب سجائے اپنے والد کے ساتھ اسکول جارہے تھے کہ تیز رفتار  ٹرالر ان کی موٹرسائیکل پر چڑھ دوڑا۔

یہ بھی پڑھیں:  تیز رفتار ڈمپر نے کئی رکشوں اور موٹرسائیکلوں کو کچل دیا

ریسکیو حکام کے مطابق تیز رفتار ٹرک کی زد میں آنے سے 15سالہ زینب اور 13سالہ اروا موقع پر ہی جان کی بازی ہار گئیں، جبکہ 14 سالہ تیمور اور10 سالہ مریم شدید زخمی ہوگئے ہیں۔

ریسکیو ٹیموں نے زخمیوں کو تشویشناک حالت کی وجہ سے بہاولپور وکٹوریہ اسپتال منتقل کردیا ہے۔

ریسکیو ذرائع کے مطابق حادثہ میلسی کے نواحی علاقے صدیق آباد میں تیز رفتار ٹرالر کی وجہ سے پیش آیا۔

پولیس کا کہنا ہے کہ ٹرالر کا ڈرائیور موقع سے فرار ہو گیا جبکہ پولیس نے ٹرک تحویل میں لیکر کاروائی شروع کر دی ہے۔