ایران کی جانب سے قطر اور عراق میں امریکی فوجی اڈوں پر میزائل حملوں کے بعد خلیج فارس کی صورتحال میں شدت آ گئی ہے، جس کے باعث پاکستان انٹرنیشنل ایئرلائنز (پی آئی اے) نے اپنی پروازوں کے شیڈول میں تبدیلی اور محدودیت کا فیصلہ کیا ہے۔

پی آئی اے کی جانب سے جاری ہونے والے ایک اعلامیے میں کہا گیا ہے کہ پاکستان سے قطر، بحرین، کویت اور دبئی کے لیے فضائی آپریشن کو عارضی طور پر منسوخ کر دیا گیا ہے۔

ایئرلائن نے وضاحت کی کہ یہ فیصلہ خلیجی ممالک میں موجودہ جنگی صورتحال اور سلامتی کے پیش نظر کیا گیا ہے۔

پی آئی اے نے اپنے مسافروں کو آگاہ کرتے ہوئے کہا ہے کہ حالات معمول پر آنے کے بعد ایئرلائن اپنی پروازوں کو دوبارہ شروع کر دے گی۔

اس کے علاوہ، پی آئی اے کے کال سینٹرز کے ذریعے مسافروں کو اپنے پروازوں کے متعلق بروقت معلومات فراہم کی جا رہی ہیں۔

اعلامیہ میں مزید کہا گیا کہ پی آئی اے کی ریزرویشن ٹیم نے متاثرہ پروازوں کے مسافروں کو دوسری دستیاب پروازوں پر منتقل کرنے کا عمل شروع کر دیا ہے تاکہ ان کے سفر میں کسی قسم کی مشکلات کا سامنا نہ ہو۔

پی آئی اے نے اپنے مسافروں سے درخواست کی ہے کہ وہ اپنے سفر سے متعلق تازہ ترین معلومات کے لیے ایئرلائن کے کال سینٹرز سے رابطہ کریں اور کسی بھی تاخیر یا منسوخی کی صورت میں ایئرلائن کے ہدایات پر عمل کریں۔