پاکستان ہاکی ٹیم کے کپتان عماد شکیل بٹ کو پاکستان اسپورٹس بورڈ کی جانب سے دی گئی 5600 روپے کی رقم کے حوالے سے پیدا ہونے والی غلط فہمی کو کلیئر کر دیا گیا ہے۔

پاکستان اسپورٹس بورڈ کی جانب سے جاری بیان میں کہا گیا ہے کہ یہ رقم دراصل نیشنز کپ کے تربیتی کیمپ میں شامل کھلاڑیوں کے لیے دی جانے والی “پاکٹ منی” ہے، نہ کہ سفر کے اخراجات جیسا کہ پہلے سمجھا گیا تھا۔

قومی ہاکی ٹیم کے کپتان عماد شکیل بٹ نے اس رقم پر ردعمل دیتے ہوئے ابتدائی طور پر ظہرانے میں شرکت سے معذرت کی اور کہا کہ اتنے پیسے تو ٹول ٹیکس کی ادائیگی میں لگ جاتے ہیں۔

بعد ازاں اسپورٹس بورڈ کے ترجمان نے وضاحت کرتے ہوئے کہا کہ یہ 5600 کی رقم سفر کے اخراجات نہیں بلکہ کیمپ کے دوران کھلاڑیوں کی پاکٹ منی تھی اور اب کپتان عماد بٹ کو یہ بات واضح کر دی گئی ہے۔

پاکستان اسپورٹس بورڈ نے نیشنل ہاکی ٹیم کے 6 نمایاں کھلاڑیوں کو ایک خصوصی ظہرانے میں مدعو کیا ہے۔ مدعو کیے گئے کھلاڑیوں میں عماد شکیل بٹ (کپتان)، سفیان خان، رانا وحید، عبداللہ، منیب الرحمن اور حنان شاہد شامل ہیں۔

ظہرانے میں ہاکی کے علاوہ دیگر کھیلوں سے تعلق رکھنے والے قومی ہیروز کو بھی مدعو کیا گیا ہے، جن میں اولمپک گولڈ میڈلسٹ ارشد ندیم اور کامن ویلتھ چیمپیئن نوح دستگیر بٹ بھی شامل ہیں۔

ترجمان کے مطابق عماد شکیل بٹ کی غلط فہمی دور ہو چکی ہے اور اب وہ تقریب میں شرکت کریں گے۔