اسرائیل کی جانب سے فلسطینیوں پر مظالم کا سلسلہ جاری ہے، اسرائیلی فوج نے امداد کے انتظار میں کھڑے شہریوں پر فائرنگ کرکے مزید 24 فلسطینیوں کو شہید اور متعدد کو زخمی کردیا ہے۔

عالمی ذرائع ابلاغ کے مطابق غزہ میں اس وقت قحط نے ڈیرے ڈال رکھے ہیں، ایسے میں خوراک کے حصول کے لیے امدادی مراکز کے باہر فلسطینیوں کے ہجوم دیکھے جاسکتے ہیں، لیکن اسرائیل نے امداد کے حصول کے لیے جمع ہونے والے شہریوں میں موٹ بانٹنا شروع کر رکھی ہے۔

اسرائیل کی جانب سے تازہ ترین حملہ وادی غزہ میں صلاح الدین اسٹریٹ پر امداد کے حصول کے لیے جمع شہریوں پر فائرنگ کی گئی ہے، جس میں 24 فلسطینی شہید ہوگئے ہیں، جبکہ متعدد افراد زخمی بھی ہوئے ہیں۔

اسرائیلی حملے میں شہید ہونے والے فلسطینیوں کی لاشوں کو ناصر میڈیکل کمپلیکس اور ال‌عودہ اسپتال منتقل کیا گیا ہے۔

یاد رہے کہ امریکا اور اسرائیل کے تعاون سے غزہ ہیومینیٹیرین فاؤنڈیشن (GHF) نے 27 مئی سے امدادی اشیا کی تقسیم کا سلسلہ شروع کر رکھا ہے۔

تاہم، GHF کے امدادی کیمپ کے باہر اسرائیلی فوج کی جانب سے امداد کے لیے جمع ہونے والے فلسطینیوں پر اکثر و بیشتر فائرنگ کی جاتی ہے، جس کے نتیجے میں 27 مئی سے اب تک 400سے زائد فلسطینی شہید اور تقریباً 1,000 زخمی ہو چکے ہیں ۔

یہی وجہ ہے کہ انسانی حقوق کی تنظیموں کی جانب سے GHF کو مشکوک قرار دیا جارہا ہے اور اسے فلسطینیوں کے قتل عام میں اسرائیل کے مددگار کے طور پر دیکھا جارہا ہے۔