ورلڈ ٹیسٹ چیمپئن شپ کا فائنل آج انگلینڈ کے تاریخی کرکٹ گراؤنڈ لارڈز پر شروع ہوگا جہاں آسٹریلیا اور جنوبی افریقا کی ٹیمیں مد مقابل آئیں گی۔

2 برس تک مختلف ٹیسٹ ممالک کے درمیان جاری رہنے والی ورلڈ ٹیسٹ چیمپئن شپ  کی جنگ کا فیصلہ کن معرکہ دفاعی چیمپئن آسٹریلیا اور جنوبی افریقا کی ٹیموں کے درمیان ہوگا۔

ورلڈ ٹیسٹ چیمپئن شپ 2025 کے فائنل کا یہ معرکہ آج سے انگلینڈ کے تاریخی کرکٹ گراؤنڈ لارڈز میں لڑا جائے گا۔

مزید پڑھیں: تیسرے ٹیسٹ کے لئے فاسٹ بولر جیمی اوورٹن انگلش اسکواڈ میں شامل

پچھلے ایڈیشن میں اوول کرکٹ گراؤنڈ پر بھارت کو زیر کرنے والی آسٹریلوی ٹیم مسلسل2 مرتبہ فائنل جیت کر نئی تاریخ رقم کرسکتی ہے۔

دوسری جانب جنوبی افریقا کی ٹیم 20  برس سے زائد عرصہ گزرجانے کے باوجود ابھی تک آئی سی سی ایونٹ کے ٹائٹل کی تلاش میں ہے۔

ٹیبل پر پہلی پوزیشن پر رہنے والی جنوبی افریقی ٹیم نے 2 برس کے عرصے میں 12 میچز کھیلے، 8 جیتے، 3 ہارے اور ایک میچ ڈرا کیا۔

دوسری جانب آسٹریلیا نے 19 میچز کھیلے، 13 جیتے ، 4 ہارے اور 2 ڈرا کیے، وہ ٹیبل پر دوسرے نمبر پر رہی۔

اس مقابلے کیلئے دونوں ٹیموں کی پلیئنگ الیون کا اعلان بھی کر دیا گیا ہے۔