شہر قائد میں رواں سال کے ابتدائی پانچ ماہ میں مختلف ٹریفک حادثات میں 427 افراد جاں بحق اور 5,503 زخمی ہوئے ہیں۔

ریسکیو حکام کے مطابق، ان حادثات میں سب سے زیادہ ہلاکتیں بھاری گاڑیوں کی زد میں آ کر ہوئیں۔

تفصیلات کے مطابق ہیوی ٹریفک کی زد میں آ کر 133 افراد جاں بحق ہوئے، جن میں سے ڈمپر کی زد میں آ کر 28 شہری جان سے گئے، ٹرالر کی ٹکر سے 52 شہری جاں بحق ہوئے، جبکہ واٹر ٹینکرز نے 29 افراد کی زندگی کا چراغ گل کیا۔

اسی طرح، مزدا کے نیچے کچل کر 11 افراد جان سے ہاتھ دھو بیٹھے، سڑکوں پر دوڑتی بسوں کی ٹکر سے 13 افراد جاں بحق ہوئے۔

ریسکیو حکام کے مطابق، مختلف ٹریفک حادثات میں جاں بحق ہونے والوں میں 329 مرد، 43 خواتین اور 55 بچے شامل ہیں۔

ان حادثات میں اضافے کے پیش نظر، سندھ حکومت نے بھاری گاڑیوں کی سڑکوں پر نقل و حرکت کے اوقات میں تبدیلی کی ہے اور ان کی فٹنس کو یقینی بنانے کے لیے اقدامات کیے ہیں، لیکن اس کے باجود ٹریفک حادثات میں کوئی فرق نہیں پڑا ہے۔