پاکستان ایئرپورٹس اتھارٹی کے زیر اہتمام نیو گوادر انٹرنیشنل ایئرپورٹ پر پہلی مرتبہ رات کے وقت فائر ایمرجنسی مشق کا انعقاد کیا گیا، جس کا مقصد ایئرپورٹ پر ہنگامی حالات میں فوری اور مؤثر ردعمل کی صلاحیت کا عملی مظاہرہ کرنا تھا۔

مشق کے دوران ایک فرضی ہوائی حادثے کی نقل تیار کی گئی جس میں ایک طیارے میں آگ لگنے کی صورتحال کو ظاہر کیا گیا۔ ریسکیو ٹیموں نے فوری رسپانس دیتے ہوئے طیارے میں لگی آگ کو بجھایا، جبکہ زخمیوں کو فوری ابتدائی طبی امداد فراہم کرنے کے لیے ٹریاژ زون قائم کیا گیا۔

 اس زون میں متاثرین کی درجہ بندی اور ان کی نوعیت کے مطابق بروقت طبی سہولیات فراہم کرنے کا عملی مظاہرہ بھی کیا گیا۔

مزید پڑھیں: نیو گوادر انٹرنیشنل ایئرپورٹ مکمل فعال؛ پہلی کمرشل پرواز لینڈ کر گئی

پاکستان ایئرپورٹس اتھارٹی کے ترجمان کے مطابق، مشق کے دوران اے ایس ایف (ایئرپورٹ سیکیورٹی فورس)، طبی عملہ، فائرفائٹرز، اور دیگر متعلقہ اداروں نے بھرپور شرکت کی۔

تمام اداروں کے مابین اعلیٰ سطح کی ہم آہنگی اور مربوط کوآرڈینیشن کا مظاہرہ دیکھنے میں آیا، جس نے ایمرجنسی کے دوران مؤثر اور بروقت کارروائی کو ممکن بنایا۔

مشق کی نگرانی چیف فائر اینڈ ریسکیو آفیسر نے کی، جبکہ سینئر حکام نے فیلڈ کمانڈ اور ایئرپورٹ ایمرجنسی پلان کے تمام پہلوؤں کا بغور جائزہ لیا۔

اس دوران رات کے وقت کی مشق میں لائٹنگ، ویزیبیلیٹی (دیکھنے کی صلاحیت) اور کمیونیکیشن سسٹمز کی فعالیت کو بھی جانچا گیا تاکہ حقیقی ایمرجنسی کی صورت میں کسی قسم کی تکنیکی یا عملی رکاوٹ نہ پیش آئے۔