بھارت کی سفارتی ناکامی پر کڑی تنقید کرتے ہوئے بھارتی ویب سائٹ دی وائیر (The Wire)  نے اپنے تازہ ترین مضمون میں لکھا ہے کہ آپریشن سندور کی ناکامی اور مودی کی سفارتی نااہلی کے نتیجے میں بھارت عالمی سطح پر تنہا ہو گیا ہے۔

مضمون میں کہا گیا ہے کہ مودی کی ’ملٹی الائنس‘ حکمت عملی ناکام رہی، کسی ملک نے بھی بھارت کا ساتھ نہ دیا، جبکہ چین نےآپریشن بنیان مرصوص میں  پاکستان کی کھل کر حمایت کی۔

مزید پڑھیں: پاک بھارت جنگ؛ عالمی برادری کا پاکستان پر بھارتی جارحیت پر اظہارِ تشویش

دی وائیر نے دعویٰ کیا کہ چین نے پاکستان کو فضائی دفاع اور سیٹلائٹ تصاویر فراہم کرنے میں بھرپور مدد فراہم کی، بھارت کے سندھ طاس معاہدے کی خلاف ورزی کے اشارے پر چین نے دریائے براہمپترا کا پانی روکنے کا عندیہ دیا۔

مودی کی سفارتی ناکامیوں کو اجاگر کرتے ہوئے دی وائیر نے لکھا کہ اقوام متحدہ سلامتی کونسل میں  بھی بھارت کی کوششیں بری طرح ناکام  ہوئیں، اقوام متحدہ کی  پریس ریلیز میں حملہ آور دہشت گرد گروپ یا پاکستان  کا ذکر تک شامل نہ   کیا گیا۔

مضمون کے مطابق بھارت کی فوجی برتری کا دعویٰ دنیا کو قائل نہ کر سکا،میدان جنگ میں بھی پاکستان بازی لے گیا، جبکہ ٹرمپ کی مداخلت نے بھارتی میڈیا کی جنگی جنونیت پر مبنی بیانیے کو خاک میں ملا دیا۔

مزید پڑھیں: پاک بھارت جنگ کے دوران بھارتی میڈیا نے جھوٹا پروپیگنڈہ پھیلایا، نیویارک ٹائمز

دی وائیر کے مطابق ٹرمپ نے مسئلہ کشمیر کو عالمی فورم پر اٹھا کر پاکستان کے مؤقف کو تقویت دی، ٹرمپ کی مداخلت نے بھارت کی عالمی طاقت بننے کی امیدوں پر پانی پھیر دیا۔ ویبسائٹ کے مطابق ٹرمپ اور سینٹرل کمانڈ (سینٹکام) کے سربراہ جنرل کیوریلا نےپاکستانی قیادت کی کھل کر تعریف کی۔

دی وائیر نے لکھا کہ فیلڈ مارشل جنرل عاصم منیر کو واشنگٹن میں عسکری اور حکمت عملی کی مضبوط شراکت داری کے لیے مدعو کیا گیا ہے۔

بھارت کی پاکستان کو تنہا کرنے کی کوششیں ناکام ہوچکی ہیں، سفارتی سطح پر پاکستان کے حمایتی بڑھتے جا رہے ہیں، جن میں امریکہ بھی شامل ہے۔