بنگلہ دیش کی معزول وزیراعظم شیخ حسینہ واجد کے اہم وزیر کی لندن میں موجود جائیدادیں ضبط کرلی گئی ہیں۔

برطانیہ کی نیشنل کرائم ایجنسی (این سی اے) نے بنگلہ دیش کی سابق وزیراعظم شیخ حسینہ واجد کے وزیر سیف الزمان چودھری کی جائیدادیں ضبط کرلیں۔

غیرملکی میڈیا کی رپورٹ کے مطابق سابق وزیر سیف الزمان چودھری کی برطانیہ میں جائیدادیں بنگلہ دیش کی موجودہ حکومت کی درخواست پر ضبط کی گئی ہیں۔

رپورٹ میں بتایا گیا کہ سیف الزمان چودھری کے خلاف اس وقت بنگلہ دیش میں منی لانڈرنگ کے الزام پر تفتیش جاری ہے۔

مزید پڑھیں: شیخ حسینہ کے خاندان کے گرد قانون کا گھیرا تنگ

این سی اے کے ترجمان نے سیف الزمان چودھری کی جائیدادیں ضبط کرنے کی خبر کی تصدیق کرتے ہوئے کہا کہ ہم تصدیق کرسکتے ہیں کہ این سی اے کو زیرتفتیش معاملے کے تحت متعدد جائیدادیں ضبط کرنے کے احکامات مل گئے ہیں۔

یاد رہے کہ برطانیہ میں جائیدادیں ضبط ہونے کا مطلب ہوگا کہ سیف الزمان چودھری اب مذکورہ جائیدادیں فروخت نہیں کرسکیں گے۔

عالمی میڈیا کی رپورٹ کے مطابق گزشتہ برس رپورٹ میں انکشاف ہوا تھا کہ سیف الزمان چودھری کی برطانیہ میں 350 سے زائد جائیدادیں ہیں تاہم این سی اے نے ان کی ضبط ہونے والی جائیدادوں سے متعلق تفصیلات جاری نہیں کی ہیں۔

رپورٹ میں بتایا گیا کہ سابق بنگلہ دیشی وزیر کا لندن کے مہنگے علاقے ایس ٹی جونز ووڈ میں پرتعیش گھر بھی ہے تاہم یہ واضح نہیں کہ اس کو بھی ضبط کیا گیا یا نہیں۔

واضح رہے کہ گزشتہ برس انٹرویو کے دوران چٹاگانگ کے ایک بااثر خاندان سے تعلق رکھنے والے سیف الزمان چودھری نے کہا تھا کہ وہ سابق وزیراعظم شیخ حسینہ واجد کے بیٹے کی طرح ہیں اور وہ جانتی ہیں کہ برطانیہ میں میرا کاروبار ہے۔