ترجمان دفتر خارجہ نے پاکستان اور بھارت کے دو طرفہ معاہدوں کی منسوخی کے حوالے سے اپنا موقف دے دیا ہے۔

دفتر خارجہ کا کہنا ہے کہ فی الحال پاکستان اور بھارت کے مابین کسی بھی دو طرفہ معاہدے کو ختم نہیں کیا گیا ہے اور نہ ہی انہیں منسوخ کیا گیا ہے۔

پاک بھارت دو طرفہ معاہدوں کے حوالے سے دفتر خارجہ کے سینئر عہدیدار کا کہنا ہے کہ بھارت کے ساتھ کشیدگی میں اضافہ ضرور ہوا مگر پاکستان نے بھارت کے ساتھ کیے گئے بین الاقوامی معاہدوں کی منسوخی پر کوئی باضابطہ فیصلہ نہیں کیا ہے۔

مزید پڑھیں: بھارت سندھ طاس جیسےکئی بین الاقوامی معاہدوں کی خلاف ورزی کر رہا ہے، دفتر خارجہ

وزیر دفاع خواجہ آصف نے اپنے انٹرویو میں مزید کہا تھا کہ بھارت کے یکطرفہ فیصلوں کے بعد ہم واپس 1948 کی پوزیشن پر آ گئے ہیں اور اب شملہ معاہدے کی حیثیت بھی ختم ہو چکی ہے۔

وزیردفاع کی جانب سے یہ بیان ایک ایسے وقت میں آیا جب دونوں ممالک کے درمیان کشیدگی بڑھ گئی تھی، اور بھارت کے حکام نے بھی متعدد مرتبہ اپنے موقف کا اظہار کیا تھا۔ تاہم دفتر خارجہ کا یہ بیان اس بات کو واضح کرتا ہے کہ پاکستان نے ابھی تک اس معاملے پر کسی بھی دوطرفہ معاہدے کو ختم کرنے کا فیصلہ نہیں کیا۔