ایرانی پاسدارانِ انقلاب کے اعلیٰ کمانڈر جنرل احمد واحدی نے کہا ہے کہ اسرائیل نے ایران پر حملہ کر کے سنگین غلطی کی ہے، اور اب وہ اس کے نتائج بھگتنے کے مرحلے میں داخل ہو چکا ہے۔

ایرانی میڈیا سے گفتگو کرتے ہوئے جنرل واحدی کا کہنا تھا کہ حالیہ جوابی کارروائی میں تل ابیب میں واقع اسرائیلی وزارتِ دفاع، صنعتی اور فوجی مراکز کو براہ راست نشانہ بنایا گیا۔

 ان کے مطابق ایرانی حملے کا بنیادی ہدف نواتیم، اودا اور تل نوف کے فضائی اڈے تھے، جہاں اسرائیلی فضائیہ کی کمانڈ اور اہم جنگی مراکز موجود تھے۔

مزید پڑھیں: اسرائیل ایران جنگ کے اثرات؛ ڈالر کی قیمت میں مزید اضافہ

جنرل واحدی نے مزید بتایا کہ یہی فضائی اڈے ایران پر ہونے والے حالیہ حملے کا مرکزی آغاز تھے۔ ایران کی جانب سے کی گئی جوابی کارروائی میں 150 سے زائد اہداف کو کامیابی سے نشانہ بنایا گیا، جس سے اسرائیل کو اندازہ ہو گیا ہے کہ ایران مکمل قوت کے ساتھ جواب دینے کی صلاحیت رکھتا ہے۔

ان کا کہنا تھاکہ دشمن یہ سمجھ بیٹھا تھا کہ وہ کچھ فوجی مراکز پر حملہ کر کے ہمیں کمزور کر دے گا اور ہم خاموش رہیں گے، لیکن آج اسے اپنی غلط فہمی کا خمیازہ بھگتنا پڑ رہا ہے۔

دوسری جانب اقوام متحدہ میں ایران کے مستقل مندوب نے بھی اسرائیل کی حالیہ جارحیت کو بلا اشتعال قرار دیتے ہوئے واضح کیا ہے کہ ایران ایسے حملوں کا سخت اور فیصلہ کن جواب دینے کا حق محفوظ رکھتا ہے۔