معاون خصوصی برائے بلاک چین و کرپٹو اور پاکستان کرپٹو کونسل کے چیف ایگزیکٹو آفیسر بلال بن ثاقب نے امریکہ میں وائٹ ہاؤس کا تاریخی دورہ کیا، جہاں انہوں نے صدر ٹرمپ کی کونسل برائے ڈیجیٹل اثاثہ جات کے ایگزیکٹو ڈائریکٹر روبرٹ ہو ہائنز سے ملاقات کی۔

اس ملاقات میں دونوں رہنماؤں نے کرپٹو کرنسی بلاک چین ٹیکنالوجی اور ڈیجیٹل اثاثوں کے مستقبل پر تفصیلی تبادلہ خیال کیا۔

بلال بن ثاقب نے پاکستان میں کرپٹو کرنسی کے شعبے میں ہونے والی پیشرفت سے آگاہ کیا اور اس بات پر زور دیا کہ پاکستان کرپٹو کرنسی کے لیے ایک مضبوط ریگولیٹری فریم ورک تیار کرنے کے لیے پرعزم ہے۔

بلال بن ثاقب نے کہا کہ کرپٹو کرنسی کے لیے امریکی اقدامات پاکستان کے لیے مشعل راہ ہیں اور اس بات پر زور دیا کہ پاکستان کرپٹو کونسل کے قیام کے بعد ملک میں بلاک چین ٹیکنالوجی اور ڈیجیٹل اثاثوں کے لیے ایک جامع پالیسی تیار کی جا رہی ہے۔

ان کا کہنا تھا کہ اس پالیسی کا مقصد نہ صرف ملکی معیشت کو ڈیجیٹل دور سے ہم آہنگ کرنا ہے بلکہ عالمی سرمایہ کاری کو بھی پاکستان کی طرف متوجہ کرنا ہے۔

روبرٹ ہو ہائنز نے ملاقات میں کہا کہ ڈیجیٹل معیشت عالمی ترقی کا لازمی جزو بن چکی ہے اور پاکستان کی بلاک چین ٹیکنالوجی میں دلچسپی کو ایک مثبت اشارہ قرار دیا۔

انہوں نے دونوں ممالک کے درمیان کرپٹو کرنسی اور بلاک چین کے شعبے میں تعاون کے امکانات کو خوش آئند قرار دیا۔

بلال بن ثاقب کا یہ حالیہ دورہ تاریخی حیثیت رکھتا ہے کیونکہ وہ گزشتہ چھ برسوں میں وائٹ ہاؤس کا سرکاری دورہ کرنے والے پاکستان کے پہلے سرکاری عہدیدار ہیں۔

اس تاریخ کے بعد اور جون 2025 سے قبل کسی بھی پاکستانی سرکاری عہدیدار کا وائٹ ہاؤس کا بالمشافہ دورہ ریکارڈ پر موجود نہیں ہے۔