رائل چیلنجرز بنگلورو (آر سی بی) کی آئی پی ایل 2025 کی فتح کے دوران چیناسوامی اسٹیڈیم کے باہر بھگدڑ کے نتیجے میں 10 افراد ہلاک اور متعدد زخمی ہوگئے۔

یہ حادثہ اس وقت پیش آیا جب ہزاروں شائقین اپنی ٹیم کی پہلی آئی پی ایل ٹائٹل کی فتح کے جشن میں شرکت کے لیے اسٹیڈیم کے دروازوں کے باہر جمع ہوئے۔

بھارتی میڈیا رپورٹس کے مطابق، آر سی بی نے احمد آباد کے نریندر مودی اسٹیڈیم میں پنجاب کنگز کو 6 رنز سے شکست دے کر 18 سال بعد اپنا پہلا آئی پی ایل ٹائٹل جیتا تھا۔

اس جیت کے بعد بنگلورو میں جشن منانے کے لیے شائقین کی ایک بڑی تعداد چیناسوامی اسٹیڈیم کے باہر جمع ہو گئی، جس سے افراتفری پھیل گئی اور ہجوم کے دباؤ کی وجہ سے بھگدڑ مچ گئی۔

مزید پڑھیں: رائل چیلنجز بینگلورو نے آئی پی ایل کا ٹائیٹل پہلی بار نام کر لیا،کوہلی آبدیدہ

ہلاک ہونے والوں میں خواتین اور ایک بچہ بھی شامل ہے۔ زخمیوں کو فوری طور پر قریبی ہسپتال منتقل کیا گیا، تاہم ہجوم اور ٹریفک کی وجہ سے ایمبولینسز کو شدید مشکلات کا سامنا کرنا پڑا، جس سے ریسکیو آپریشن میں تاخیر ہوئی۔

آر سی بی کی جشن منانے والی اوپن ٹاپ بس پریڈ کو بنگلورو ٹریفک پولیس اور کرناٹک کے ہوم منسٹر نے سیکیورٹی اور ٹریفک مسائل کی وجہ سے منسوخ کر دیا تھا، تاہم اس کے باوجود شائقین کی بڑی تعداد ودھان سودھا اور چیناسوامی اسٹیڈیم کے باہر جمع ہوگئی۔ اس صورتحال نے تشویش پیدا کی اور حادثے کی صورت اختیار کر لی۔