غزہ کی پٹی میں اسرائیلی فورسز کی تازہ ترین کارروائیوں میں کم از کم 59 فلسطینی شہید ہو گئے ہیں۔

اسرائیلی فورسز نے خوراک کی تلاش میں امدادی کیمپوں کے باہر کھڑے شہریوں پر فائرنگ کی ہے، جس کے نتیجے میں 59 فلسطینی شہید ہوگئے ہیں، ان میں سے بیشتر وہ تھے، جو امدادی مراکز کے باہر کھڑے تھے۔

عینی شاہدین کے مطابق، اسرائیلی فوج نے ان شہریوں پر بغیر کسی انتباہ کے فائرنگ کی، جس کے نتیجے میں متعدد افراد موقع پر ہی شہید ہو گئے۔

مزید پڑھیں: امدادی کیمپ پر اسرائیلی فائرنگ اور فضائی حملوں میں 41 فلسطینی شہید

غزہ کی وزارت صحت کے مطابق، گزشتہ 24 گھنٹوں میں اسرائیلی حملوں میں 41 فلسطینی شہید ہوئے ہیں، جن میں سے پانچ افراد امریکی امداد سے چلنے والے مراکز کے قریب فائرنگ کا نشانہ بنے۔

عالمی اداروں اور انسانی حقوق کی تنظیموں نے ان حملوں کی شدید مذمت کی ہے اور انہیں جنگی جرائم قرار دیا ہے۔ انہوں نے اسرائیل سے مطالبہ کیا ہے کہ وہ امدادی کارروائیوں کو محفوظ بنائے اور بین الاقوامی قوانین کا احترام کرے۔

غزہ کی پٹی میں جاری اسرائیلی جارحیت کے نتیجے میں اب تک 54,249 فلسطینی شہید اور 123,492 زخمی ہو چکے ہیں۔

انسانی حقوق کی تنظیموں نے اس صورتحال کو “نسل کشی” قرار دیا ہے اور عالمی برادری سے فوری مداخلت کا مطالبہ کیا ہے۔