قطر میں ہونے والی ایشین ماسٹرز ویٹ لفٹنگ چیمپئن شپ کے آخری روز، پاکستان کے ویٹ لفٹرز نے شاندار کارکردگی کا مظاہرہ کرتے ہوئے مزید دو طلائی تمغے جیتے، جس سے ایونٹ میں پاکستان کے مجموعی گولڈ میڈلز کی تعداد 8 ہو گئی۔

پاکستان کے فرقان انور نے ایج گروپ 30، ویٹ کیٹیگری 89 کلوگرام میں مجموعی طور پر 315 کلوگرام وزن اٹھا کر گولڈ میڈل اپنے نام کیا۔ انہوں نے اسنیچ میں 143 کلوگرام اور کلین اینڈ جرک میں 172 کلوگرام وزن اٹھایا۔

مزید پڑھیں: ویٹ لفٹنگ میں مہارت رکھنے والی لڑکی نے صارفین کو دنگ کر دیا

اس سے قبل، پاکستان کے عمر رسول لون نے ایج گروپ 35، ویٹ کیٹیگری 89 کلوگرام میں مجموعی طور پر 276 کلوگرام وزن اٹھا کر گولڈ میڈل جیتا۔ انہوں نے اسنیچ میں 121 کلوگرام اور کلین اینڈ جرک میں 155 کلوگرام وزن اٹھایا۔

مردوں کے ایج گروپ 35 کی ویٹ کیٹیگری 109 کلوگرام میں پاکستان کے عثمان راٹھور نے برانز میڈل جیتا۔ انہوں نے مجموعی طور پر 282 کلوگرام وزن اٹھایا۔ یاد رہے کہ ایونٹ کے پہلے روز عثمان کے والد مقصود امجد راٹھور نے پاکستان کے لیے گولڈ میڈل جیتا تھا۔

ایشین ماسٹرز ویٹ لفٹنگ چیمپئن شپ میں پاکستان نے مجموعی طور پر 8 گولڈ، 1 سلور اور 2 برانز میڈلز جیتے۔ گولڈ میڈلز حاصل کرنے والوں میں فرقان انور، عمر رسول لون، رشید خان، کاشف ریحان، محمد اقبال، نادیہ مقصود، سیبل سہیل اور مقصود امجد راٹھور شامل ہیں۔ سلور میڈل نیلم ریاض نے اور برانز میڈلز عثمان امجد راٹھور اور عبد المالک نے حاصل کیے۔