امریکی وزیر خارجہ مارکو روبیو نے اعلان کیا ہے کہ شام میں لڑنے والے مختلف گروہوں نے باہمی جھڑپیں ختم کرنے پر اتفاق کرلیا ہے۔

اس پیش رفت کو خطے میں قیام امن کی جانب ایک اہم قدم قرار دیا جا رہا ہے۔

مارکو روبیو نے کہا کہ شام کے تمام فریقین سے رابطہ کیا ہے، یہ اقدامات آج رات شام میں خوفناک صورتحال کو ختم کردیں گے۔ انہوں نے اس بات پر زور دیا کہ تمام شامی فریقین کو اپنے وعدوں پر عمل کرنا ہوگا۔

مزید پڑھیں: شام، دمشق میں اسرائیل کے ایران اور حزب اللہ کے ٹھکانوں پر میزائل حملے

اعلان کے مطابق یہ اتفاق رائے بین الاقوامی سفارتی کوششوں اور طویل مذاکرات کا نتیجہ ہے۔ امریکی وزیر خارجہ نے کہا کہ اس فیصلے سے انسانی بحران میں کمی آئے گی اور پائیدار سیاسی حل کی راہ ہموار ہوگی۔

فوری طور پر یہ واضح نہیں ہو سکا کہ اس معاہدے میں شامی حکومت، اپوزیشن گروپس اور دیگر غیر ریاستی عناصر کا کتنا عمل دخل ہے، تاہم مبصرین کا کہنا ہے کہ اگر اس معاہدے پر عملدرآمد کیا گیا تو شام میں کئی سال سے جاری خانہ جنگی میں نمایاں کمی آسکتی ہے۔

مزید پڑھیں: شام کے ملٹری کالج پر ڈرون حملے میں 100 سے زائد افراد ہلاک

بعد ازاں شام نے بھی اعلان کیا کہ اس کی فوج نے شہر سویدا سے انخلاء شروع کر دیا ہے۔ یہ فیصلہ اسرائیل کے دارالحکومت دمشق پر متعدد فضائی حملوں اور امریکا کی جانب سے فوجی انخلا کے مطالبے کے بعد سامنے آیا۔

واضح رہے کہ بدھ کو اسرائیلی فوج نے شامی دارالحکومت پر شدید فضائی حملوں میں شامی وزارت دفاع کی عمارت کو نشانہ بنایا تھا۔

خبررساں ایجنسی کے مطابق اسرائیل کی جانب سے دمشق میں صدارتی محل کے قریب بھی فضائی حملے کیے گئے۔اسرائیل نے مطالبہ کیا تھا کہ دروز قبائل پر حملہ آور شامی فوج فوری طور پر سویدا سے نکل جائے ۔