سندھ اسمبلی کی پبلک اکاؤنٹس کمیٹی (پی اے سی) نے ایس بی سی اے سے شہر میں غیر قانونی تعمیرات کا مکمل ریکارڈ طلب کرلیا ہے۔

پی اے سی کی جانب سے ریکارڈ طلب کئے جانے کے بعد سندھ بلڈنگ کنٹرول اتھارٹی (ایس بی سی اے) کے افسران پر مشتمل 13 رکنی کمیٹی تشکیل دے دی گئی ہے۔

کمیٹی سال 2020‑21 کی پرفارمنس آڈٹ رپورٹ کی روشنی میں غیر قانونی تعمیرات اور مخدوش عمارتوں کے مسئلے پر کارکردگی جانچے گی۔

مزید پڑھیں: چار منزلہ عمارت گر گئی، بچی معجزانہ طور پر زندہ بچ گئی، ویڈیو وائرل

کمیٹی کا اہم مشن پی اے سی کی جانب سے اٹھائے گئے سوالات کے جوابات مرتب کرنا ہے، جس کے لیے نوٹیفکیشن کے مطابق ارکان ڈی جی ایس بی سی اے کے تعاون سے جواب فراہم کریں گے ۔

تیار کردہ جوابات دو روز کے اندر ڈی جی ایس بی سی اے سے منظور کروائے جائیں گے، اور منظوری ملتے ہی رپورٹ سیکرٹری بلدیات سندھ کو بھیجی جائے گی، اس طرح عمل درآمد کے اہداف کو شفاف طریقے سے آگے بڑھایا جا سکے گا ۔

نوٹیفکیشن میں یہ بھی واضح کیا گیا ہے کہ کمیٹی ارکان پبلک اکاؤنٹس کمیٹی کی میٹنگ میں ڈی جی ایس بی سی اے کے ہمراہ شریک ہوں گے۔

حال ہی میں چیئرمین و ایک ممبر کی معطلی کے بعد یہ کمیٹی دوبارہ تشکیل دی گئی ہے۔