سندھ کے علاقے نوشہروفیروز کے علاقے محبت ڈیرو میں ایک ہولناک واقعے نے علاقے کو ہلا کر رکھ دیا، جہاں فائزہ چنہ نامی لڑکی کو مبینہ طور پر زیادتی، اغواء اور پھر قتل کا نشانہ بنایا گیا۔ معاملے میں جرگے، بااثر وڈیرے اور غفلت کا عنصر بھی سامنے آیا ہے۔

 ابتدائی حقائق:

ڈی ایس پی مجید آرائیں کے مطابق، ابتدائی طبی رپورٹ میں بتایا گیا ہے کہ لڑکی کی موت نیند کی گولیاں زیادہ مقدار میں لینے کی وجہ سے ہوئی۔ تاہم حتمی نتائج پوسٹ مارٹم رپورٹ آنے کے بعد ہی واضح ہوں گے۔

مزید پڑھیں: جرگے کے حکم پرایک اورشادی شدہ خاتون قتل،دوسرے شوہرنے خودکوپولیس کے حوالے کردیا

انہوں نے مزید بتایاکہ متاثرہ لڑکی کے جسم کے دیگر اجزاء محفوظ کیے گئے ہیں، جو لیبارٹری تجزیے کے لیے بھیجے جا رہے ہیں۔”

 ورثاء کا مؤقف:

مقتولہ فائزہ چنہ کی نانی نے الزام عائد کیا ہے کہ لڑکی کو وڈیرے کے پاس بطور امانت چھوڑا گیا تھا، جہاں سے ملزمان نے اسے اغواء کیا اور بعد ازاں قتل کر دیا۔

وڈیرے کا اعتراف:

معاملے میں اہم موڑ اس وقت آیا جب بااثر وڈیرا عزیز اللہ ڈہراج نے تسلیم کیا کہ لڑکی کے ورثاء میرے ملازم ہیں، زیادتی کے معاملے کے بعد دونوں فریق میرے پاس آئے اور جرگے کے ذریعے فیصلہ کرنے پر زور دیا۔

وڈیرے کے مطابق لڑکے والوں پر 4 لاکھ روپے جرمانہ عائد کیا گیا، دو رشتے لڑکی والوں کو بطور متبادل دینے کا بھی فیصلہ دیا گیا، لڑکی کی ملزم کے ساتھ شادی کا فیصلہ بھی جرگے میں ہوا۔

تاہم، وڈیرے نے دعویٰ کیا کہ لڑکی میرے پاس بطور امانت نہیں تھی، اس کا آنا جانا ضرور تھا، لیکن وہ میرے پاس نہیں رہی۔ اسے زہر کس نے دیا، مجھے علم نہیں۔

 پولیس کی تفتیش جاری:

ڈی ایس پی نے واضح کیا ہے کہ وڈیرے کے کردار، جرگے کی نوعیت اور اغواء سمیت دیگر پہلوؤں پر تفتیش جاری ہے۔ اگر لڑکی وڈیرے کے پاس بطور امانت تھی تو اغواء کی کوئی رپورٹ کیوں درج نہ کی گئی؟”

متاثرہ لڑکی کے ساتھ دو ہفتے قبل زیادتی کا واقعہ ہوا تھا، مگر پولیس کو اطلاع نہیں دی گئی۔ آج جب اطلاع ملی تو پولیس نے فوری اسپتال پہنچ کر پوسٹ مارٹم کے احکامات جاری کیے۔

 انسانی حقوق کی سنگین خلاف ورزی:

یہ واقعہ نہ صرف ایک مبینہ جنسی جرم اور قتل ہے بلکہ اس میں غیر قانونی جرگے کے ذریعے انصاف کے نام پر غیر انسانی فیصلے کیے گئے، جس نے عدالتی نظام، پولیس کی کارکردگی اور دیہی اثرورسوخ کے مسائل کو بھی بے نقاب کیا ہے۔