پاکستانی ایئرلائنز کی برطانیہ میں پروازوں کی بحالی کی راہ میں اہم پیشرفت ہوئی ہے، کیونکہ برطانوی محکمہ ٹرانسپورٹ کی تین رکنی ٹیم اسلام آباد پہنچ گئی ہے۔

یہ ٹیم آج سے اسلام آباد ایئرپورٹ کا سیکیورٹی آڈٹ شروع کرے گی، جو برطانیہ کے لیے پاکستانی ایئرلائنز کی پروازوں کی بحالی کے حوالے سے کلیدی اہمیت رکھتا ہے۔

ٹیم کی جانب سے کیے جانے والے سیکیورٹی، آپریشنز اور مسافروں کے انتظامات کے جائزے کا مقصد برطانیہ کے ایئر سیفٹی معیار پر پورا اترنا ہے۔

ٹیم 10 جولائی تک اپنی رپورٹ مرتب کرے گی، جسے رواں ماہ ہونے والے برطانوی ایئر سیفٹی کمیٹی کے اجلاس میں پیش کیا جائے گا۔

یہ اجلاس پاکستانی ایئرلائنز، خصوصاً پاکستان انٹرنیشنل ایئرلائنز (پی آئی اے) پر عائد پابندی کے خاتمے کے حوالے سے فیصلہ کرے گا۔

سول ایوی ایشن ذرائع کے مطابق اگر رپورٹ میں کامیاب نتائج آتے ہیں، تو پابندی کے خاتمے کی راہ ہموار ہو سکتی ہے۔

یاد رہے کہ جولائی 2020 میں پائلٹس لائسنس اسکینڈل کے بعد برطانوی حکومت نے پاکستانی ایئرلائنز کی برطانیہ کے لیے پروازوں پر پابندی عائد کر دی تھی، جس کے بعد سے دونوں ممالک کے درمیان فضائی روابط میں رکاوٹیں پیدا ہو گئی تھیں۔