ویسٹ انڈیز کے جارح مزاج سابق اوپننگ بیٹر کرس گیل نے جنوبی افریقہ کے نوجوان بیٹر ویان ملڈر کی جانب سے برائن لارا کا 400 رنز ناٹ آؤٹ کا ریکارڈ نہ توڑنے کے فیصلے کو ایک غلطی قرار دے دیا ہے۔

حالیہ دنوں زمبابوے کے خلاف ٹیسٹ سیریز کے دوسرے میچ میں ویان ملڈر نے شاندار کارکردگی کا مظاہرہ کرتے ہوئے ناقابل شکست 367 رنز کی اننگز کھیلی۔

ملڈر کے پاس دنیا کی سب سے بڑی انفرادی ٹیسٹ اننگز برائن لارا کا 400 ناٹ آؤٹ کا تاریخی ریکارڈ توڑنے کا موقع تھا، تاہم انھوں نے اس سے گریز کیا۔

میچ کے بعد ویان ملڈر نے بیان دیا تھا کہ انھوں نے یہ فیصلہ برائن لارا کے احترام میں کیا کیونکہ وہ انہیں ایک عظیم کھلاڑی مانتے ہیں۔

تاہم، کرس گیل اس موقف سے متفق نہیں دکھائی دیے۔ ایک بیان میں گیل نے کہا کہ اگر مجھے ایسا موقع ملتا تو میں ضرور 400 سے آگے جانے کی کوشش کرتا۔

یہ مواقع بار بار نہیں آتے۔ آپ کو نہیں معلوم کہ اگلی ٹرپل سنچری کب بنے گی، لہٰذا ایسے لمحے میں بھرپور فائدہ اٹھانا چاہیے۔

گیل نے مزید کہا کہ ممکن ہے کہ ملڈر گھبرا گئے ہوں یا وہ دباؤ میں آکر یہ فیصلہ نہ کر پائے ہوں۔ میری رائے میں انھوں نے ریکارڈ توڑنے کی کوشش نہ کرکے ایک موقع ضائع کیا۔

واضح رہے کہ برائن لارا نے 2004 میں انگلینڈ کے خلاف ٹیسٹ میچ میں 400 رنز ناٹ آؤٹ بنا کر یہ تاریخی ریکارڈ قائم کیا تھا، جو آج تک برقرار ہے۔