گزشتہ روز کچے کے ڈاکوؤں نے رحیم یار خان سے باغ میں کام کرنے والے 2 کمسن بچوں سمیت 13 مزدوروں کو اغوا کرلیا تھا، پولیس 24 گھنٹے گزرنے کے بعد تاحال مغویوں کو بازیاب کرانے میں ناکام رہی ہے۔

اطلاعات کے مطابق رحیم یار خان پولیس نے 13افراد کے اغوا کا مقدمہ تھانہ سی سی ڈی میں درج کرلیا ہے، اغوا کا مقدمہ باغ کے ٹھیکدار عبد الکریم کی مدعیت میں درج کیا گیا  ہے۔

یاد رہے کہ کچے کے ڈاکوؤں نے پنجاب کے شہر رحیم یار خان  سے گزشتہ روز 13 افراد کو اغوا کر لیا تھا، جن میں 2 کم سن بچے بھی شامل تھے۔

مزید پڑھیں: سندھ اور پنجاب وزرائے اعلیٰ کا کچے کے ڈاکوؤں کیخلاف مشترکہ آپریشن پر اتفاق

ڈی پی او رحیم یار خان نے مزدوروں کے اغوا کی تصدیق کرتے ہوئے بتایا کہ تھانے کی حدود کا تعین کیا جا رہا ہے، واردات سون میانی اور بھونگ کے قریب پیش آئی ہے، مغویوں کو بازیاب کرانے کے لیے تھانے کی حدود کا تعین کیا جارہا ہے۔

ڈی پی او نے کہا کہ متاثرہ خاندانوں کو انصاف فراہم کرنے اور اغوا شدگان کی فوری بازیابی کے لئے علاقائی پولیس ٹیمیں،انٹیلی جنس ڈیوژن، اور علاقائی حدود کی وضاحت پر تیزی سے کام کر رہی ہیں۔

مزید پڑھیں: اوکاڑہ کا ایک اور شہری کچے کے ڈاکوؤں کے چنگل میں پھنس گیا

پولیس حکام کے مطابق اغوا ہونے والے مزدوروں میں رشید احمد، وسیم احمد، ندیم احمد، صدام حسین، گل حسن، بلال، حنیف، ندیم، کاشف، ماجد، عمیر، شاہ میر اور تنویر شامل ہیں۔