ترکیہ کے مغربی ساحلی علاقوں میں شدید گرمی کے بعد بھڑکنے والی جنگلاتی آگ نے بڑے پیمانے پر تباہی مچادی ہے۔

گزشتہ چند روز کے دوران 50 ہزار سے زائد افراد کو متاثرہ علاقوں سے محفوظ مقامات پر منتقل کر دیا گیا ہے، جن میں زیادہ تر کا تعلق صوبہ ازمیر سے ہے۔

ترک حکام کے مطابق آگ نے بیلی جِک، ہاتائے، ساکاریا اور مانیسہ کے مختلف دیہی و پہاڑی علاقوں کو بھی لپیٹ میں لے لیا ہے، جہاں امدادی ٹیمیں آگ بجھانے کے لیے سرگرم عمل ہیں۔

ترک وزیر جنگلات ابراہیم یومکلی نے بتایا کہ گزشتہ تین دنوں کے دوران ملک بھر میں 263 سے زائد جنگلاتی آتشزدگی کے واقعات رپورٹ ہوئے جن پر قابو پانے کے لیے ایمرجنسی ریسپانس ٹیمیں متحرک ہیں۔

ترک وزیر صحت کمال میمش اوغلو کے مطابق، 46 افراد جنہیں آگ یا دھویں سے متاثر کیا گیا، اسپتالوں میں زیر علاج ہیں۔

ادھر پرتگال میں بھی درجہ حرارت میں غیرمعمولی اضافے کے بعد جنگلاتی آگ کے خطرے کے پیش نظر 10 اضلاع کی 80 سے زائد کونسلز کو انتہائی خطرے کی سطح پر قرار دیا گیا ہے۔

انسٹی ٹیوٹو پرتگیش دو مار ای اتموسفیرا (Portuguese Institute for Sea and Atmosphere) کے مطابق، ویلا ریئل، براگا، براگانسا، پورٹو، ویسو، گواردا، کاسٹیلو برانکو، سنتاریم، پورٹالےگرے اور فیرو کے اضلاع میں الرٹ جاری کر دیا گیا ہے۔

ملک کے مختلف علاقوں میں درجہ حرارت میں شدید تفاوت دیکھی گئی ہے، جہاں آویرو میں زیادہ سے زیادہ درجہ حرارت 24 ڈگری سینٹی گریڈ تک پہنچا، جبکہ بیجا میں پارہ 43 ڈگری سینٹی گریڈ کی حد عبور کر چکا ہے۔