نیشنل ڈیزاسٹر مینجمنٹ اتھارٹی (NDMA) نے 6 جولائی سے 10 جولائی تک ملک بھر میں شدید موسمی صورتحال سے متعلق ہنگامی الرٹ جاری کر دیا ہے۔

الرٹ کے مطابق آئندہ چند روز میں آندھی، گرج چمک کے ساتھ بارشیں، اور کئی علاقوں میں شہری و دیہی سیلاب کی صورتحال پیدا ہونے کا خدشہ ہے۔

پنجاب

اسلام آباد، راولپنڈی، اٹک، جہلم، چکوال، میانوالی، سرگودھا، خوشاب، گوجرانوالہ، گجرات، فیصل آباد، لاہور، قصور اور اوکاڑہ میں آندھی اور طوفانی بارش کی پیشگوئی کی گئی ہے۔

جنوبی پنجاب کے شہروں ملتان، خانیوال، بہاولپور، بہاولنگر، رحیم یار خان اور ڈیرہ غازی خان میں تیز ہواؤں کے ساتھ موسلادھار بارش کا امکان ہے۔

خیبرپختونخوا

دیر، سوات، چترال، کوہستان، شانگلہ، بونیر، بٹگرام، صوابی، نوشہرہ، چارسدہ، ملاکنڈ، مانسہرہ، ایبٹ آباد، پشاور، مردان، ہری پور، بنوں اور کوہاٹ میں گرج چمک کے ساتھ شدید بارش کی توقع ہے۔

گلگت بلتستان و آزاد کشمیر

گلگت، اسکردو، ہنزہ، آستور، دیامر، گانچھے، شگر، مظفرآباد، وادی نیلم، راولا کوٹ، حویلی اور باغ میں شدید بارش اور لینڈ سلائیڈنگ کا خدشہ ہے، جو ممکنہ سیلابی صورتحال کو جنم دے سکتی ہے۔

سندھ

کراچی سمیت سکھر، نوابشاہ، حیدرآباد، تھرپارکر، عمرکوٹ، سانگھڑ، جامشورو، مٹھی، بدین، ٹھٹھہ، ٹنڈو الہ یار اور میرپور خاص میں بارش کی پیشگوئی، جبکہ لاڑکانہ، گھوٹکی، خیرپور، شکارپور، جیکب آباد اور دادو میں شدید بارشوں کی وارننگ جاری کر دی گئی ہے۔

بلوچستان

کوئٹہ، ژوب، زیارت، قلات، خضدار، بارکھان، آواران، جعفرآباد، سبی، لسبیلہ، کوہلو، ڈیرہ بگٹی، لورالائی، نصیرآباد سمیت متعدد اضلاع میں موسلا دھار بارشوں کا امکان ہے جس سے لینڈ سلائیڈنگ اور اربن فلڈنگ کے خدشات بڑھ گئے ہیں۔

 ممکنہ خطرات اور احتیاطی تدابیر:

شہری علاقوں میں اربن فلڈنگ، لینڈ سلائیڈنگ، ٹریفک کی روانی میں خلل، اور بجلی کی بندش کے امکانات

کمزور تعمیرات، کچی دیواروں، بجلی کے کھمبوں اور بل بورڈز سے دور رہنے کی ہدایت

آندھی طوفان کے دوران حد نگاہ کم ہو سکتی ہے، سفر میں احتیاط کریں

ندی نالوں میں پانی کے بہاؤ میں اچانک اضافہ ممکن ہے – قریبی علاقوں میں رہنے والے محتاط رہیں

این ڈی ایم اے کی اپیل:

این ڈی ایم اے نے تمام متعلقہ اداروں کو پیشگی انتظامات کی ہدایت جاری کر دی ہے تاکہ کسی بھی ہنگامی صورتحال سے مؤثر طور پر نمٹا جا سکے۔

عوام سے گزارش کی گئی ہے کہ وہ پاک این ڈی ایم اے ڈیزاسٹر الرٹ ایپ ڈاؤن لوڈ کر کے لمحہ بہ لمحہ موسم اور خطرات کے حوالے سے باخبر رہیں۔