قومی احتساب بیورو (نیب) نے بحریہ ٹاؤن کراچی کے خلاف کارروائی کا دائرہ مزید وسیع کرتے ہوئے آج ایک اور بڑا چھاپہ مارا، جس میں متعدد قیمتی گاڑیاں تحویل میں لے لی گئیں۔

ذرائع کے مطابق، یہ گاڑیاں اب نیب کے دفتر منتقل کی جا رہی ہیں، جہاں ان کی قانونی جانچ پڑتال کی جائے گی۔

بحریہ ٹاؤن کراچی کے خلاف 17 ہزار ایکڑ زمین کی مبینہ غیر قانونی الاٹمنٹ کا ریفرنس پہلے ہی عدالت میں زیرِ سماعت ہے۔

نیب حکام کا کہنا ہے کہ تمام کارروائی قانون کے مطابق کی جا رہی ہے اور کسی قسم کا کوئی سمجھوتہ یا ڈیل نہیں ہوئی۔

یاد رہے کہ کچھ ماہ قبل نیب نے بحریہ ٹاؤن کی کئی کمرشل پراپرٹیز کو منجمد کر دیا تھا۔ اس کے بعد سے مختلف ذرائع کی جانب سے ڈیل ہونے کا تاثر پھیلایا جا رہا تھا، جسے نیب ذرائع نے آج کی کارروائی کے بعد واضح طور پر مسترد کر دیا ہے۔

نیب ذرائع کا کہنا ہے کہ بحریہ ٹاؤن کے ساتھ کوئی مفاہمت، کوئی رعایت نہیں، صرف قانون کے مطابق کارروائی جاری ہے۔ جو بھی ملوث ہوگا، اس کے خلاف ثبوت کے ساتھ کارروائی کی جائے گی۔

نیب کی تازہ کارروائی نے بحریہ ٹاؤن کراچی پر قانونی دباؤ مزید بڑھا دیا ہے، اور ذرائع کے مطابق، آئندہ دنوں میں مزید اثاثوں کی نشاندہی اور ضبطی کا امکان ہے۔