خیبر پختونخوا میں تحریک انصاف (پی ٹی آئی) کے سینٹ الیکشن کے امیدواروں کی فہرست میں نام نکالنے کے معاملے نے ایک نیا تنازعہ جنم لے لیا ہے۔

پی ٹی آئی پشاور سٹی کے صدر عرفان سلیم کا نام سینٹ الیکشن کی امیدواروں کی فہرست سے نکالنے پر پارٹی کے ورکروں نے سخت ردعمل ظاہر کیا۔

پشاور کے مختلف علاقوں سے تعلق رکھنے والے پارٹی ورکروں نے اس فیصلے کے خلاف احتجاج کیا اور ایک پریس کانفرنس میں اس بات کا اظہار کیا کہ پارٹی کے اندرونی اختلافات کی وجہ سے فیصلے کئے جا رہے ہیں۔

ورکروں نے پلے کارڈز پر ورکروں کے حق پر ڈاکہ ڈالنے جیسے نعرے درج کیے اور سخت غصے کے ساتھ جمع ہوئے۔ ان کا کہنا تھا کہ یہ احتجاج کسی فرد واحد کے خلاف نہیں بلکہ پورے پارٹی کے اصولوں اور فیصلوں کے خلاف ہے۔

پریس کانفرنس میں بتایا گیا کہ پی ٹی آئی نے عرفان سلیم کو سینٹ کے امیدوار کے طور پر منتخب کیا تھا اور ان کی خدمات کو پارٹی کے لیے انتہائی اہمیت دی جاتی ہے۔

 پارٹی کی مقامی سطح پر خدمات سے لے کر اعلیٰ عہدوں تک عرفان سلیم نے کئی سالوں تک پی ٹی آئی کے لیے کام کیا ہے۔

 نو مئی کے فسادات کے بعد جب بہت سے لوگوں نے پارٹی چھوڑ دی تھی، عرفان سلیم نے اپنی وفاداری اور عزم کا مظاہرہ کرتے ہوئے پارٹی کی صفوں میں اپنی جگہ مستحکم رکھی۔

ورکروں کا یہ بھی کہنا تھا کہ عرفان سلیم کا نام سینٹ امیدواروں کی فہرست سے نکالنے کی کوئی سازش کی جا رہی ہے۔

 پی ٹی آئی پشاور ڈسٹرکٹ کے سابق جنرل سیکریٹری جلال نے اس بات کا دعویٰ کیا کہ بیرسٹر سیف، جو ایک مشکوک شخص ہیں، نے اڈیالہ جیل جانے کے بعد پارٹی کے اندرونی معاملات میں مداخلت کی اور عرفان سلیم کا نام سینٹ امیدواروں کی فہرست سے نکالنے میں اہم کردار ادا کیا۔

جلال نے مزید کہا کہ اس دوران عرفان سلیم کو دھمکیاں بھی دی جا رہی ہیں تاکہ وہ اپنے کاغذات واپس لے لیں۔

پی ٹی آئی کے ورکروں نے یہ عزم ظاہر کیا کہ وہ کاغذات واپس نہیں لیں گے اور سینٹ کی فہرست پر نظرثانی کی جائے تاکہ موقع پرست عناصر اور اے ٹی ایم مشین والوں کو اس فہرست سے نکالا جا سکے۔

ورکروں کا کہنا تھا کہ یہ فیصلہ نہ صرف پارٹی کے اصولوں کے خلاف ہے بلکہ ان لوگوں کی محنت اور وفاداری کی بھی توہین ہے جنہوں نے پارٹی کے لیے محنت کی ہے اور اس کے عروج میں اہم کردار ادا کیا ہے۔