دبئی: قومی ٹیم کے فاسٹ بولر شاہین شاہ آفریدی نے کہا ہے کہ ٹی ٹوئنٹی کرکٹ میں کوئی بھی ٹیم آسان نہیں ہوتی، ہر میچ ایک چیلنج ہوتا ہے۔

میڈیا سے گفتگو کرتے ہوئے ان کا کہنا تھا کہ ایشیا کپ کے بڑے مقابلے کے لیے تیاری زور و شور سے جاری ہے، کل رات بھی ٹیم نے بھرپور پریکٹس سیشن کیا۔

انہوں نے کہا کہ تین ملکی سیریز ایشیا کپ کی تیاریوں میں اہم کردار ادا کرے گی اور کھلاڑیوں کو کنڈیشنز کے مطابق کھیلنے کا موقع ملے گا۔ شاہین کا کہنا تھا کہ اس مرتبہ ٹیم پہلے سے زیادہ جلدی تیاری کے لیے متحدہ عرب امارات پہنچی ہے، جو مثبت پیش رفت ہے۔

مزید پڑھیں: جیتی ہوئی تینوں ٹرافیز کے ساتھ شاہین آفریدی کی تصویر وائرل

فاسٹ بولر نے کہا کہ ہمارا پہلا ہدف تین ملکی سیریز ہے اور اس کے بعد ایشیا کپ پر توجہ مرکوز کی جائے گی۔ انہوں نے نوجوان کھلاڑیوں کی کارکردگی پر اعتماد کا اظہار کرتے ہوئے کہا کہ یہ بھی ہماری ٹیم کا حصہ ہیں اور سب کو انہیں سپورٹ کرنا چاہیے۔

شاہین شاہ آفریدی نے ٹیم میں اختلافات کی خبروں کی تردید کرتے ہوئے کہا کہ ایسی باتیں صرف باہر سے سننے کو ملتی ہیں، حقیقت میں ٹیم ایک فیملی کی طرح ہے، اور فیملی میں معمولی باتیں ہو جاتی ہیں۔

انہوں نے بابر اعظم اور محمد رضوان کو ورلڈ کلاس پلیئر قرار دیتے ہوئے کہا کہ دونوں نے ہمیشہ بہترین کرکٹ کھیلی ہے اور آئندہ بھی پاکستان کے لیے شاندار پرفارمنس دکھائیں گے۔