پاکستان کرکٹ بورڈ (پی سی بی) نے خواتین کرکٹرز کے لیے 2025-26 سیزن کے سینٹرل کنٹریکٹس کا باضابطہ اعلان کر دیا ہے۔

بورڈ نے اس سال کھلاڑیوں کے معاوضوں میں 50 فیصد اضافہ کرتے ہوئے پانچ کیٹیگریز میں 20 کھلاڑیوں کو کنٹریکٹس جاری کیے ہیں۔

پی سی بی نے انٹرنیشنل کرکٹ کونسل (آئی سی سی) کی ٹی ٹوئنٹی بولنگ رینکنگز میں نمبر ون پوزیشن حاصل کرنے والی اسپنر سعدیہ اقبال کو کیٹیگری اے میں شامل کیا ہے۔ ان کے ساتھ کیٹیگری اے میں فاطمہ ثنا، منیبہ علی اور سدرہ امین کو بھی کنٹریکٹ دیا گیا ہے۔

مزید پڑھیں: سابق ٹیسٹ کرکٹر نے پی سی بی سے راہیں جدا کر لیں، مگر کیوں؟ جانیے

کیٹیگری بی میں عالیہ ریاض، ڈیانا بیگ اور نشرا سندھو کو رکھا گیا ہے۔ جبکہ کیٹیگری سی میں اسپنر رمین شمیم کو شامل کیا گیا ہے۔

پی سی بی نے نوجوان اور ابھرتی ہوئی کھلاڑیوں کے لیے ایک نئی ایمرجنگ کیٹیگری متعارف کرائی ہے، جس میں نوجوان کرکٹرز ایمان فاطمہ اور شوال ذوالفقار کو شامل کیا گیا ہے تاکہ انہیں مستقبل کے چیلنجز کے لیے تیار کیا جا سکے۔

کیٹیگری ڈی میں شامل کھلاڑیوں میں گل فیروزہ، نجیہ علوی، ناتالیہ پرویز، عمائمہ سہیل، صدف شمس، سدرہ نواز، عروب شاہ، طوبیٰ حسن، ام ہانی اور وحیدہ اختر کے نام شامل ہیں۔

پی سی بی حکام کے مطابق کنٹریکٹس کا مقصد خواتین کرکٹ کے شعبے میں پیشہ ورانہ معیار اور کھلاڑیوں کی فلاح و بہبود کو مزید بہتر بنانا ہے۔