بھارت کے تجارتی مرکز ممبئی میں موسلا دھار اور طوفانی بارشوں نے تباہی مچادی، سڑکیں، بازار اور نشیبی علاقے زیر آب آگئے۔

بھارتی میڈیا کے مطابق ممبئی میں موسلا دھار بارش کے باعث نظام زندگی مفلوج ہوگیا ہے اور کئی مقامات پر آمدورفت معطل ہوچکی ہے۔

محکمہ موسمیات کے مطابق گزشتہ 24 گھنٹوں میں ریکارڈ بارش ہوئی جس نے شہر کو ڈبو دیا۔ ہنگامی صورتحال کے پیش نظر مقامی انتظامیہ نے ایمرجنسی نافذ کردی ہے، اسکول بند اور دفاتر میں تعطیل کا اعلان کر دیا گیا۔

رپورٹس کے مطابق نشیبی علاقوں میں گھروں میں پانی داخل ہوگیا ہے جبکہ ٹرین سروس اور ہوائی اڈے پر پروازوں کا شیڈول بھی شدید متاثر ہوا ہے۔ ریسکیو ٹیمیں شہریوں کو محفوظ مقامات پر منتقل کرنے میں مصروف ہیں۔

ماہرین کا کہنا ہے کہ اگر بارش کا سلسلہ مزید جاری رہا تو صورتحال مزید سنگین ہوسکتی ہے۔