قومی اسمبلی کا اجلاس یکم ستمبر کو بلانے کا فیصلہ کر لیا گیا ہے، جس میں ملک کے اہم قومی امور زیر غور آئیں گے۔

 اجلاس کے دوران اپوزیشن کی جانب سے اپنے قائدین کی سزاؤں اور گرفتاریوں کا معاملہ بھی ایوان میں اٹھائے جانے کا امکان ہے۔

اسپیکر قومی اسمبلی نے ماہِ ربیع الاول کے تقدس اور اہمیت کے پیش نظر اجلاس کے دوران اس مقدس مہینے کو بھرپور مذہبی عقیدت و احترام سے منانے کی ہدایت جاری کی ہے۔

پارلیمانی ذرائع کے مطابق اجلاس میں ربیع الاول کے حوالے سے خصوصی تقاریر کی جائیں گی جبکہ پارلیمنٹ ہاؤس میں فن خطاطی کی نمائش کا بھی انعقاد کیا جائے گا، جس میں حضور اکرم ﷺ کی شان میں تخلیق کیے گئے فن پارے پیش کیے جائیں گے۔

اس موقع پر ایوان سے نبی کریم ﷺ کی ذاتِ مقدس سے متعلق عقیدت و احترام پر مبنی ایک قرارداد بھی منظور کی جائے گی۔

اجلاس کے دوران سیاسی، معاشی، داخلی و خارجی امور سمیت متعدد اہم قومی معاملات پر بحث متوقع ہے۔