دنیا بھر میں پاکستان کے 78 ویں یوم آزادی کے حوالے سے تقریبات کا انعقاد کیا جا رہا ہے، پردیس میں بسنے والے پاکستانی اپنے ملک کا جشن آزادی دھوم دھام سے منا رہے ہیں۔

دبئی ایکسپو سٹی میں پاکستان کے 78 ویں یومِ آزادی کی شاندار اور تاریخ ساز تقریب کا انعقاد ہوا، جس میں 60 ہزار سے زائد پاکستانیوں اور شائقین نے شرکت کر کے اسے دنیا بھر میں سب سے بڑی آزادی ڈے تقریب بنا دیا۔

تقریب میں ننھے بچوں سے لے کر اسی برس تک کے بزرگ شریک ہوئے۔ نوجوانوں نے قومی، ثقافتی اور جدید دھنوں پر پُرجوش رقص کیا، جبکہ پاکستان کے مختلف فنکاروں نے ملی نغموں اور موسیقی کے ذریعے حاضرین کو محظوظ کیا۔

چاروں صوبوں، گلگت بلتستان اور آزاد کشمیر سے آئے فنکاروں نے موسیقی، رقص، روایتی ملبوسات اور ذائقے دار کھانوں کے ذریعے وطن عزیز کے متنوع ثقافتی ورثے کو دنیا کے سامنے اجاگر کیا۔

تقریب کے دوران درجنوں فوڈ اسٹالز پر عوام کی طویل قطاریں نظر آئیں جہاں پاکستانی ذائقے سے بھرپور پکوان شرکاء کو پیش کیے گئے۔

تقریب سے خطاب کرتے ہوئے پاکستان کے متحدہ عرب امارات میں سفیر فیصل نیاز ترمذی نے کہا کہ یہ دنیا کی سب سے بڑی پاکستان انڈپینڈنس ڈے تقریب ہے، جس میں 60 ہزار سے زائد لوگ رجسٹرڈ ہو کر شریک ہو رہے ہیں۔

گزشتہ سال دبئی ورلڈ ٹریڈ سینٹر میں منعقدہ تقریب میں 15 ہزار افراد شریک ہوئے تھے، تاہم اس سال عوام کے بے حد جوش و خروش کو دیکھتے ہوئے منتظمین نے تقریب کو ایکسپو سٹی جیسے بڑے مقام پر منتقل کیا۔