مٹیاری میں سندھ کے عظیم صوفی شاعر اور بزرگ حضرت شاہ عبداللطیف بھٹائیؒ کے 282ویں سالانہ تین روزہ عرس مبارک کی تقریبات دوسرے دن بھی عقیدت و احترام کے ساتھ جاری ہیں۔

عرس کے دوسرے روز وزیر اعلیٰ بلوچستان میر سرفراز بگٹی اور گورنر سندھ کامران ٹسوری درگاہ شریف پر چادر چڑھا کر حاضری دیں گے۔

مزید پڑھیں: شاہ عبداللطیف بھٹائی نے اپنی شاعری میں امن اور انسانیت کا پیغام دیا ہے، بلاول بھٹو زرداری

عرس میں شرکت کے لیے پانچ لاکھ سے زائد زائرین کی آمد متوقع ہے۔ زائرین کی حفاظت کے لیے 2 ہزار 688 پولیس اہلکار اور 100 لیڈی پولیس اہلکار تعینات کیے گئے ہیں، جبکہ 200 رینجرز اہلکار کو بھی ہائی الرٹ رکھا گیا ہے۔

ایس ایس پی مٹیاری کے مطابق عرس کی تمام سرگرمیوں کو چھ سیکٹرز میں تقسیم کیا گیا ہے اور 37 مقامات پر 24 گھنٹے پولیس کی مانیٹرنگ جاری رہے گی۔

زائرین کی سیکورٹی کے لیے مختلف جگہوں پر پانچ واک تھرو گیٹ نصب کیے گئے ہیں جبکہ ایک کنٹرول روم قائم کرکے تمام سرگرمیوں کی سی سی ٹی وی کیمروں سے سخت نگرانی کی جا رہی ہے۔

درگاہ پر 150 سے زائد رضاکار موجود ہیں اور بھٹ شاہ ٹاؤن کمیٹی کی جانب سے 200 سے 250 افراد کو خدمات کے لیے طلب کیا گیا ہے۔