راولپنڈی کے علاقہ تھانہ ایئرپورٹ پولیس نے 15 پر موصول اطلاع پر فوری کارروائی کرتے ہوئے انسانی اعضاء کی غیر قانونی پیوند کاری میں ملوث گینگ کو بے نقاب کر دیا۔

پولیس نے گینگ کے 4 کارندوں کو گرفتار کر کے پیوند کاری میں استعمال ہونے والے آلات بھی برآمد کر لیے۔

ترجمان پولیس کے مطابق اطلاع موصول ہوئی تھی کہ ایک گھر سے کسی کے چیخنے چلانے کی آوازیں آ رہی ہیں، جس پر پولیس نے فوری رسپانڈ کیا۔ چھاپے کے دوران پولیس نے ایک شخص کو اسٹریچر سے بندھا ہوا پایا، جسے فوری طور پر بازیاب کروایا گیا۔

مزید پڑھیں: انسانی اسمگلنگ میں ملوث مافیا کیخلاف ملک بھر میں مؤثر کریک ڈاؤن کا حکم

متاثرہ شخص نے پولیس کو بتایا کہ اسے نوکری کا جھانسہ دے کر بلایا گیا تھا، جہاں نشہ آور شے پلا کر نیم بیہوش کیا گیا اور مختلف میڈیکل ٹیسٹ کیے گئے۔ مقدمے کے متن کے مطابق ٹیسٹ کروانے کا مقصد متاثرہ شخص کا گردہ نکال کر فروخت کرنا تھا۔

پولیس کے بروقت اور مؤثر ردعمل سے ایک شخص خطرناک غیر قانونی پیوندکاری کا شکار ہونے سے بچ گیا۔ ملزمان کے انکشافات کے مطابق وہ پاکستانی اور غیر ملکی شہریوں کے گردے فروخت کرنے کے مکروہ دھندے میں ملوث تھے۔

پولیس کے مطابق گرفتار ملزمان سے مزید تفتیش جاری ہے جبکہ ان کے دیگر ساتھیوں اور سہولت کاروں کی گرفتاری کے لیے چھاپے مارے جا رہے ہیں۔