لاہور: قومی سلیکشن کمیٹی نے جنوبی افریقہ کے خلاف آئندہ ٹیسٹ سیریز کے لیے 18 رکنی اسکواڈ کا اعلان کر دیا ہے۔

کپتان شان مسعود اپنی قیادت جاری رکھیں گے جبکہ تین نئے کھلاڑی آصف آفریدی، فیصل اکرم اور روحیل نذیربھی اسکواڈ کا حصہ بن گئے ہیں۔

سیریز کا پہلا ٹیسٹ 12 سے 16 اکتوبر تک لاہور کے قذافی اسٹیڈیم میں کھیلا جائے گا، جبکہ دوسرا ٹیسٹ 20 سے 24 اکتوبر راولپنڈی میں ہوگا۔

ٹیم کا ٹریننگ کیمپ 30 ستمبر سے 8 اکتوبر تک لاہور میں جاری رہے گا، اور پہلے ٹیسٹ سے قبل اسکواڈ مزید مختصر کیا جائے گا۔ ایشیا کپ کھیلنے والے کھلاڑی 4 اکتوبر کو سکواڈ کو جوائن کریں گے۔

اسکواڈ میں بابر اعظم، محمد رضوان اور شاہین شاہ آفریدی جیسے بڑے نام شامل ہیں۔ دیگر کھلاڑیوں میں عبداللہ شفیق، امام الحق، سلمان علی آغا، سعود شکیل، عامر جمال، حسن علی اور خرم شہزاد بھی ٹیم کا حصہ ہیں۔ اسپن باؤلنگ کے شعبے میں نعمان علی، ساجد خان، کامران غلام اور ابرار احمد کو شامل کیا گیا ہے۔

ٹیم مینجمنٹ کا کہنا ہے کہ نوجوان کھلاڑیوں کو موقع دینے کا مقصد بینچ اسٹرینتھ بڑھانا اور مستقبل کے لیے متبادل کھلاڑی تیار کرنا ہے۔