بارسلونا: اسرائیلی محاصرہ توڑنے اور غزہ کے عوام تک امداد پہنچانے کے لیے گلوبل صمود فلوٹیلا ہسپانوی شہر بارسلونا سے روانہ ہوگیا۔

کشتیوں نے اتوار کی سہ پہر ساڑھے تین بجے بندرگاہ سے رختِ سفر باندھا، جہاں کارکنان، معاونین اور شہری بڑی تعداد میں انہیں الوداع کہنے موجود تھے۔

فلوٹیلا میں شامل رضاکاروں کا کہنا تھا کہ ہمارے حوصلے بلند ہیں، سب ایک دوسرے کے لیے اجنبی ہیں لیکن ہر ایک کا ایک اہم کردار ہے۔

منتظمین کے مطابق اس قافلے میں 44 ممالک کی نمائندگیاں شامل ہیں اور مزید کشتیاں یونان، اٹلی اور تیونس کی بندرگاہوں سے بھی شریک ہوں گی۔ قافلہ وسط ستمبر تک غزہ پہنچنے کی توقع ہے۔

Advertisement

As the Global Sumud Flotilla departs from Barcelona, thousands gather at the port to send off participants with heartfelt messages of solidarity, hope, and love for Palestine. pic.twitter.com/1czlCkcYg2

— Global Sumud Flotilla (@GlobalSumudF) August 31, 2025

روانگی سے قبل معروف ماحولیاتی کارکن گریٹا تھنبرگ نے کہا کہ اسرائیل کھلے عام فلسطینی قوم کو مٹانے کی کوشش کر رہا ہے اور عالمی رہنما اپنی قانونی ذمہ داریاں پوری کرنے میں ناکام ہیں۔

فلسطینی کارکن سیف ابو کشیک نے اسرائیل پر فلسطینیوں کو قحط، بمباری اور جبری بے دخلی کے ذریعے ختم کرنے کا الزام لگایا۔

یہ روانگی اس وقت سامنے آئی ہے جب اقوام متحدہ نے غزہ میں قحط کی صورتحال کا باضابطہ اعلان کیا ہے۔ اسرائیل کے حملوں اور محاصرے کے باعث تقریباً 10 لاکھ فلسطینیوں کو جبری بے دخلی کا سامنا ہے۔

مزید پڑھیں: فریڈم فلوٹیلا کی گریٹا تھنبرگ کو اسرائیلی حراست سے رہائی مل گئی، سویڈن کیلیے روانہ

یاد رہے کہ جون اور جولائی میں فلوٹیلا کے دو پچھلے مشن، ’’مدلین‘‘ اور ’’ہندالہ‘‘، اسرائیلی افواج نے راستے میں روک دیے تھے اور کارکنوں کو گرفتار کرنے کے بعد ملک بدر کردیا گیا تھا۔

منتظمین کا کہنا ہے کہ ہمیں اغوا کیا گیا اور روکا گیا، مگر ہم نے کہا تھا کہ ہم واپس آئیں گے، اور آج ہم دوبارہ نکلے ہیں۔

ماہرین کے مطابق یہ اقدام علامتی مزاحمت کی حیثیت رکھتا ہے جو دنیا کی توجہ اسرائیل کی ناکہ بندی اور فلسطینی عوام کی حالتِ زار کی جانب مبذول کرائے گا، اگرچہ امکان یہی ہے کہ اسرائیل اسے ایک بار پھر روکنے کی کوشش کرے گا۔