جلالپورپیروالا: سیلاب متاثرین کی پرائیویٹ کشتی الٹنے کے المناک واقعے میں ہلاکتوں کی تعداد 17 تک پہنچ گئی ہے۔

بول نیوز کے مطابق افسوسناک حادثہ رات گئے موہانہ سندیلہ کے مقام پر پیش آیا، جہاں کشتی میں 28 افراد سوار تھے۔ مقامی لوگوں نے فوری کارروائی کرتے ہوئے 19 افراد کو زندہ بچا لیا جبکہ کچھ متاثرین تیر کر محفوظ مقام تک پہنچنے میں کامیاب ہوگئے۔ تاہم متعدد افراد دریا کی موجوں میں بہہ گئے۔

ابتدائی طور پر 4 سالہ سلمان کی لاش برآمد ہوئی جس کے بعد ریسکیو آپریشن کے دوران مزید پانچ لاشیں نکالی گئیں۔ جاں بحق افراد میں 7 سالہ فیضان، 8 سالہ فیضان، 18 سالہ عاصمہ، 13 سالہ عرفان اور 8 سالہ ارم بی بی شامل ہیں۔ باقی 3 لاپتہ افراد کی تلاش کے لیے ریسکیو ٹیمیں کام کر رہی ہیں۔

سرکاری ذرائع کے مطابق تحصیل انتظامیہ نے 12 گھنٹے کی تاخیر کے بعد ریسکیو آپریشن شروع کیا، جس پر مقامی افراد نے افسوس اور احتجاج کا اظہار کیا۔ ڈی ایس پی محمد رمضان کے مطابق باقی لاپتہ افراد کو ڈھونڈنے کے لیے ریسکیو ٹیموں کو الرٹ کردیا گیا ہے۔

واضح رہے کہ جلالپورپیروالا میں چند گھنٹوں کے دوران کشتی الٹنے کے دو الگ الگ واقعات پیش آئے جن میں مجموعی طور پر 17 افراد جاں بحق ہو چکے ہیں۔ دونوں حادثات کے شکار افراد سیلاب متاثرین تھے جو سرکاری مدد نہ ملنے کے باعث پرائیویٹ کرائے کی کشتی پر شہر جا رہے تھے۔