ریاض: وزیراعظم شہباز شریف سعودی ولی عہد شہزادہ محمد بن سلمان کی دعوت پر سعودی عرب کے دورے پر ریاض پہنچ گئے ہیں۔

کنگ خالد انٹرنیشنل ایئرپورٹ پر ریاض کے نائب گورنر شہزادہ محمد بن عبد الرحمن نے وزیراعظم کا پرتپاک استقبال کیا۔

وزیر اعظم کے ہمراہ نائب وزیرِ اعظم اسحاق ڈار، وزیرِ دفاع خواجہ آصف، وزیرِ خزانہ محمد اورنگزیب، وزیرِ اطلاعات عطاء تارڑ، وزیر ماحولیات مصدق ملک اور معاون خصوصی طارق فاطمی بھی موجود ہیں۔

اس موقع پر سعودی عرب میں پاکستانی سفیر احمد فاروق، سعودی سفیر نواف بن سعید المالکی اور اعلیٰ حکام بھی موجود تھے۔

وزیراعظم کی ریاض آمد پر شہر بھر میں سبز ہلالی پرچم لہرائے گئے جب کہ انہیں 21 توپوں کی سلامی بھی دی گئی۔ سعودی افواج کے چاق و چوبند دستے نے وزیراعظم کو گارڈ آف آنر پیش کیا۔

یہ بھی پڑھیں: پاکستان کی معیشت کو ڈیجیٹل خطوط پر استوار کرنا وقت کی ضرورت ہے، وزیراعظم

ذرائع کے مطابق وزیراعظم شاہی دیوان، قصر یمامہ میں سعودی ولی عہد شہزادہ محمد بن سلمان سے ملاقات کریں گے جہاں باضابطہ استقبال کیا جائے گا۔ ملاقات میں پاکستان اور سعودی عرب کے تعلقات کے تمام پہلوؤں کا تفصیلی جائزہ لیا جائے گا۔

دونوں رہنما باہمی دلچسپی کے علاقائی و عالمی امور پر تبادلہ خیال کریں گے جب کہ مختلف شعبوں میں تعاون بڑھانے کے حوالے سے عملی پیش رفت بھی متوقع ہے۔

یاد رہے کہ وزیراعظم شہباز شریف کل سعودی عرب سے برطانیہ جب کہ 21 ستمبر  کو برطانیہ سے امریکہ روانہ ہوں گے۔ وزیراعظم امریکا کے دورے کے دوران نیویارک میں جنرل اسمبلی اجلاس میں شرکت کریں گے۔

شہباز شریف کی 22 ستمبر کو نیویارک میں فلسطین سے متعلق سربراہ کانفرنس میں شرکت متوقع ہے۔ وزیراعظم 27 ستمبر کو امریکا سے پھر برطانیہ روانہ ہوں گے اور 29 ستمبر کو برطانیہ سے وطن واپس پہنچیں گے۔