جے یو آئی ف کے سربراہ مولانا فضل الرحمان نے اپنے امن مارچ کے دوران شرکاء سے خطاب کرتے ہوئے کہا کہ جے یو آئی ف نے ہمیشہ عوام کے حقوق کی آواز بلند کی ہے اور امن کے پیغام کو پورے پاکستان میں پھیلایا ہے۔

مولانا فضل الرحمان نے اس بات کا اعادہ کیا کہ جے یو آئی ف کے منشور کو حقیقت میں بدلنا ان کا مقصد ہے اور اس کی تکمیل کے لئے ان کی جماعت کوئی کسر نہیں چھوڑے گی۔

مولانا نے سندھ کے عوام کو مخاطب کرتے ہوئے کہا کہ سندھ کے ایک حصے سے دوسرے حصے تک ہم نے امن کا پیغام پہنچایا اور جے یو آئی کی آواز پر آپ لوگوں نے لبیک کہا۔

یہ امن مارچ پہلی مرتبہ نہیں ہو رہا، اس سے قبل بھی آپ لوگوں نے اپنے صوبے میں امن کی آواز بلند کی۔ آج بھی آپ عوام کی آواز ہیں۔

مولانا فضل الرحمان نے خیبر پختونخوا میں امن کی کمی کا ذکر کرتے ہوئے کہا کہ اس صوبے میں امن کا فقدان ہے، اور جے یو آئی ف ہی وہ جماعت ہے جو عوام کی آواز بن کر ان مسائل کو اجاگر کر رہی ہے۔

انہوں نے بلوچستان کے عوام کے لیے بھی جے یو آئی ف کی حمایت کا اعلان کیا اور کہا کہ وہاں لوگوں کو غائب کر دیا جاتا ہے، لیکن جے یو آئی ف ان کی آواز بن کر ان کے حقوق کے لیے لڑ رہی ہے۔

مولانا نے عوام کے مینڈیٹ کی چوری اور سیاسی تحریک کے جاری رکھنے کے بارے میں کہا کہ ہم نے صبر کا دامن ہاتھ سے نہیں جانے دیا اور اپنی سیاسی تحریک کو جاری رکھا۔ اگر ہم نے پورے ملک سے عوام کو بلایا تو اسلام آباد پورا قبضہ میں ہوگا۔

جے یو آئی ف کے سربراہ نے کہا کہ امن کا کوئی بھی نظام صرف اور صرف اسلامی نظام کے تحت ممکن ہے، ہم نے کبھی قوم کو نفرتوں کی بنیاد پر نہیں لڑایا، بلکہ ہمیشہ محبت کو فروغ دیا ہے۔

مولانا فضل الرحمان نے امت مسلمہ کی موجودہ صورتحال پر گہرے خیالات کا اظہار کیا اور کہا کہ آج فلسطین پر قبضے کی بات ہو رہی ہے اور اسرائیل گریٹر اسرائیل کا دعویٰ کر رہا ہے۔ جے یو آئی ف ہمیشہ فلسطین کے مسلمانوں کی آواز رہی ہے اور ہم نے ہمیشہ کہا ہے کہ اسرائیل ایک ناجائز ریاست ہے۔

انہوں نے کہا کہ جب تک امت مسلمہ آپس میں لڑتی رہے گی، دنیا ہمیں نشانہ بنائے گی، ہم اسلامی بلاک کی طرف جانے کی حوصلہ افزائی کریں گے اور اختلافات کی اس خلیج کو ختم کرنے کے لیے کام کریں گے۔

مولانا فضل الرحمان نے سعودی ولی عہد کے ساتھ پاکستان کے دفاعی معاہدے پر خوشی کا اظہار کیا اور کہا کہ پاکستان اور سعودی عرب اسلامی دنیا کی قیادت کی صلاحیت رکھتے ہیں۔

ہم نے ہمیشہ کہا ہے کہ پاکستان اور سعودی عرب اسلامی دنیا کی قیادت کی صلاحیت رکھتے ہیں، اور آج ہم خوش ہیں کہ جے یو آئی ف کے منشور کے مطابق یہ معاہدہ ہوا ہے۔