لاہور: وزیراعلیٰ پنجاب مریم نواز شریف نے کہا ہے کہ پنجاب کے عوام نے ہمیشہ ملک و قوم کے لیے قربانیاں دی ہیں لیکن کبھی نفرت یا انتشار کا سبب نہیں بنے۔

انہوں نے کہا کہ اگرچہ رضی دادا کی جانب سے غیر مناسب جملہ کہا گیا تھا، مگر انہوں نے کھلے دل سے معافی مانگ کر اعلیٰ ظرفی اور اخلاق کا ثبوت دیا۔ مریم نواز شریف کے مطابق، معافی کے باوجود انہیں نشانہ بنانا ناانصافی اور تعصب کے زمرے میں آتا ہے۔

مزید پڑھیں: سیلابی ریلے کے باوجود کوئی بڑا جانی نقصان نہیں ہوا، اللہ کا شکر ہے، مریم نواز

وزیراعلیٰ نے شکوہ کیا کہ وہ لوگ جو صوبائی تعصب کو ہوا دیتے ہیں اور نفرت انگیز بیانیے پھیلاتے ہیں، ان سے کوئی سوال نہیں کیا جاتا۔

ان کا مزید کہنا تھا کہ شناختی کارڈ دیکھ کر معصوم پنجابیوں کا خون بہایا جاتا رہا، لیکن ہم نے کبھی صوبائی تعصب یا نفرت نہیں پھیلائی۔

مریم نواز شریف نے زور دیا کہ نفرت کی سیاست اور صوبائی تقسیم کے بیانیے کو مسترد کرنا ہی پاکستان کو مضبوط بنانے کا واحد راستہ ہے۔