لاہور: دیوالی کے تہوار کے موقع پر بھی لاہور کی فضاء آلودہ رہے گی، پنجاب حکومت شہریوں سے ماسک پہننے سمیت دیگر احتیاطی تدابیر اختیار کرنے کی اپیل کردی۔

لاہور میں اسموگ کی صورتحال بدترین ہونے کے بعد سینئر صوبائی وزیر مریم اورنگزیب نے شہریوں سے اپیل کی ہے کہ وہ ماسک پہنیں، بچے، بزرگ اور سانس کے مریض غیر ضروری طور پر باہر نہ نکلیں۔

ان کا کہنا تھا کہ اسموگ پر قابو پانے میں ہر شہری کا کردار کامیابی کی کنجی ہے۔

دوسری جانب پنجاب حکومت نے اسموگ کے خطرات سے نمٹنے کے لیے اینٹی اسموگ گنز تیار کر لی ہیں، جن سے ٹھوکر نیاز بیگ اور دیگر آلودہ علاقوں میں رات سے آپریشن شروع ہوگا۔

پنجاب اسموگ مانیٹرنگ سینٹر کے مطابق آج لاہور کا ‘اے کیو آئی’ 210 سے 230 کے درمیان رہنے کا امکان ہے، جبکہ امرتسر، لدھیانہ اور ہریانہ سے آنے والی ہوائیں لاہور، فیصل آباد، ساہیوال، بہاولپور، رحیم یار خان اور ملتان میں آلودگی پھیلائیں گی۔

واسا، ایل ڈی اے اور ضلعی اداروں کو کوڑا جلانے، فصلوں کی باقیات تلف کرنے اور تعمیراتی مقامات پر ڈھانپنے کے اقدامات یقینی بنانے کی ہدایت دی گئی ہے۔

جاری کردہ پیش گوئی کے مطابق صبح اور رات کے اوقات میں فضائی آلودگی شدید رہے گی جبکہ دوپہر 1 سے 5 بجے کے دوران معمولی بہتری متوقع ہے۔