چیئرمین پاکستان پیپلز پارٹی بلاول بھٹو زرداری نے کراچی میں منعقدہ ایک سیمینار سے خطاب کرتے ہوئے غزہ کی صورتحال پر شدید تشویش کا اظہار کیا ہے۔

ان کا کہنا تھا کہ تاریخ میں پہلی بار اس پیمانے پر بچوں کی نسل کشی کی گئی، ایسی مثال پہلے نہیں دیکھی گئی۔

انہوں نے کہا کہ سینیٹر رضا ربانی اپنی نئی کتاب غزہ کے بچوں کے نام کر رہے ہیں، جو اس مسئلے کی سنگینی کو اجاگر کرنے کی ایک اہم کاوش ہے۔

 بلاول بھٹو نے کہا کہ ہر پاکستانی غزہ اور فلسطین کے مظلوم عوام کے ساتھ کھڑا ہے۔

انہوں نے اسرائیل کو تنقید کا نشانہ بناتے ہوئے کہا کہ “تاریخ میں سب سے زیادہ جنگ بندی توڑنے والا ملک اسرائیل رہا ہے۔

بلاول نے بتایا کہ وزیراعظم پاکستان بھی حال ہی میں مصر میں منعقدہ غزہ امن سربراہی اجلاس میں شریک ہوئے، جہاں سیزفائر معاہدے پر دستخط بھی ہوئے۔

 تاہم، بلاول بھٹو نے اس معاہدے کے تسلسل پر تشویش کا اظہار کرتے ہوئے کہا کہ امید ہے یہ سیزفائر قائم رہے گا، مگر خدشہ ہے کہ ایک بار پھر دھوکہ نہ ہو۔

خطاب کے دوران بلاول بھٹو زرداری نے سندھ حکومت کی کارکردگی پر بھی روشنی ڈالتے ہوئے کہا کہ خیرپور کا اسپیشل اکنامک زون دنیا کے بہترین زونز میں شامل ہو چکا ہے، یہ سندھ حکومت کا کارنامہ ہے جسے دنیا نے تسلیم کیا ہے۔ انہوں نے واضح کیا کہ “ہم آپس میں نہیں، دنیا سے مقابلہ کرنے آئے ہیں۔

بلاول نے بی آئی ایس پی (بینظیر انکم سپورٹ پروگرام) کی اہمیت پر زور دیتے ہوئے کہا کہ یہ پروگرام نہ صرف پاکستان بلکہ پوری دنیا میں غربت مٹانے کا ایک کامیاب ماڈل تسلیم کیا جاتا ہے۔

 پی ٹی آئی اور مسلم لیگ (ن) دونوں نے ماضی میں اسی پروگرام کو مختلف ناموں سے عوامی فلاح کے لیے استعمال کیا۔

چیئرمین پیپلز پارٹی نے 2022 کے تباہ کن سیلاب کا ذکر کرتے ہوئے کہا کہ اقوام متحدہ کے سیکریٹری جنرل نے پاکستان کا دورہ کیا اور سندھ حکومت کی بحالی کی کوششوں کو سراہا۔ سندھ میں سیلاب متاثرین کے لیے 20 لاکھ گھروں کی تعمیر جاری ہے۔

خطاب کے اختتام پر بلاول بھٹو نے دلچسپ انداز میں گورنر سندھ کو مخاطب کرتے ہوئے کہا کہ گورنر صاحب آپ کو خیبرپختونخوا پہنچنا چاہیے، وزیراعلیٰ سندھ سے گزارش ہے کہ اپنا جہاز گورنر صاحب کو دے دیں تاکہ وہ وہاں آئینی ذمہ داریاں نبھا سکیں۔