کولمبو: پاکستان ویمنز کرکٹ ٹیم اپنا چوتھا میچ 15 اکتوبر کو انگلینڈ کے خلاف پریما داسا انٹرنیشنل کرکٹ اسٹیڈیم میں کھیلے گی۔

میچ مقامی وقت کے مطابق دوپہر 3 بجے شروع ہوگا، ٹیم آج ہیڈ کوچ محمد وسیم کی نگرانی میں دوپہر 2 سے شام 5 بجے تک پریکٹس سیشن کرے گی، جس میں کھلاڑیاں بیٹنگ، بولنگ اور فیلڈنگ کی مشقیں کریں گی۔

واضح رہے کہ پاکستان ویمنز کرکٹ ٹیم نے 2025 کے آئی سی سی ویمنز کرکٹ ورلڈ کپ میں اب تک تین میچز کھیلے ہیں لیکن کسی بھی میچ میں فتح حاصل نہیں کر سک ہے۔

پہلے میچ میں پاکستان نے بنگلہ دیش کے خلاف 129 رنز بنائے، جسے بنگلہ دیش نے 3 وکٹوں کے نقصان پر حاصل کر لیا اور میچ 7 وکٹوں سے جیتا۔

دوسرے میچ میں بھارت کے خلاف پاکستان 159 رنز پر آل آؤٹ ہو گئی، جبکہ بھارت نے 247 رنز بنائے اور 88 رنز سے کامیابی حاصل کی۔ تیسرے میچ میں آسٹریلیا کے خلاف پاکستان نے 114 رنز بنائے، اور آسٹریلیا نے 221 رنز بنا کر 107 رنز سے میچ جیت لیا۔

اس سے قبل پاکستان نے 2025 کے ویمنز کرکٹ ورلڈ کپ کوالیفائر میں شاندار کارکردگی کا مظاہرہ کیا تھا اور تمام میچز جیت کر کوالیفائی کیا۔ تاہم، ورلڈ کپ میں ٹیم کی کارکردگی میں بہتری کی ضرورت ہے کیونکہ تینوں میچز میں شکست کا سامنا کرنا پڑا۔