چمن بارڈر پر واقع بابِ دوستی مکمل طور پر اپنی اصل حالت میں بحال ہے، اور افغان طالبان کے جانب سے کیے گئے تباہی کے جھوٹے دعوے مکمل طور پر بے نقاب ہو چکے ہیں۔

آئی جی ایف سی (نارتھ) نے چمن سیکٹر کے اگلے مورچوں کا دورہ کیا جس کا مقصد موجودہ آپریشنل صورتحال کا جائزہ لینا اور پاک فوج کے جوانوں کو حوصلہ افزائی فراہم کرنا تھا۔ دورے کے دوران بابِ دوستی کی مکمل سالمیت کو بھی یقینی بنایا گیا۔

سیکیورٹی ذرائع کے مطابق، افغان طالبان ریجیم کے سرکاری ترجمان نے گزشتہ روز بابِ دوستی کو تباہ کرنے کا جھوٹا دعویٰ کیا تھا، تاہم درحقیقت افغانستان کی جانب کا گیٹ طالبان نے خود بارودی مواد کے ذریعے تباہ کیا تھا تاکہ پراپیگنڈہ کیا جا سکے۔

ذرائع کا کہنا ہے کہ افغان طالبان مذہب کے نام پر جھوٹے پروپیگنڈے اور منافرت پھیلانے کی مذموم کوشش کر رہے ہیں، جسے سیکیورٹی فورسز بخوبی ناکام بنا رہی ہیں۔

پاک افغان سرحد پر سیکیورٹی فورسز کی سخت نگرانی اور موثر حکمت عملی کی بدولت سرحدی علاقوں میں مکمل امن و استحکام برقرار ہے۔